বুধবাৰে পণ্য পৰিসেৱা কৰৰ কাঠামোৰ বৃহৎ পৰিবৰ্তনৰ সিদ্ধান্ত ঘোষণা কৰিছে কেন্দ্ৰই৷ ৩ ছেপ্টেম্বৰত অনুষ্ঠিত দীৰ্ঘম্যাদি বৈঠকৰ পাছতেই কেন্দ্ৰীয় বিত্তমন্ত্ৰী নিৰ্মলা সীতাৰমনে নতুন জিএছটিৰ হাৰ ঘোষণা কৰিছে৷ সাধাৰণ জনতাৰ সুবিধাৰ কথা মূৰত ৰাখি কেন্দ্ৰীয় চৰকাৰে পৰিবৰ্তনৰ প্ৰস্তাৱ দিছিল জি এছ টি কাউন্সিলক৷ বৈঠকত সেয়া অনুমোদন দিছে কাউন্সিলে৷
আগন্তুক ২২ ছেপ্টেম্বৰৰ পৰা নতুন জি এছ টিৰ হাৰ কাৰ্যকৰী কৰা হব৷ যিসমূহ পণ্যৰ কৰ কমোৱা হৈছে তাৰ মাজতে আছে সৰু গাড়ী৷ অৰ্থাৎ পূজাৰ পূৰ্বে যিসকলে নতুন বাহন ক্ৰয় কৰাৰ কথা ভাৱিছে তেওঁলোকৰ বাবে বোনাছৰ ব্যৱস্থা কৰিছে বিত্তমন্ত্ৰীয়ে৷ টিভি, এচি, সৰু গাড়ী, ৩৫০ চিচিৰ তলৰ বাইকৰ দাম কমোৱাৰ কথা ঘোষণা কৰিছে জি এছ টি কাউন্সিলে৷ এতিয়াৰে পৰা এই পণ্যসমূহত ২৮শতাংশৰ সলনি ১৮ শতাংশ জিএছটি লোৱা হব৷ বিলাসবহুল বাহনৰ অৱশ্যে জিএছটি কমোৱা হোৱা নাই৷ কিন্তু অভাৱনীয়হাৰত কমোৱা হৈছে সৰু গাড়ীৰ দাম৷
ভাৰতীয় বাহনৰ বজাৰত মেৰুদণ্ড হিচাপে ধৰা হয় সৰু গাড়ীসমূহক৷ বিগত কেইবাবছৰ ধৰি বাহন বিক্ৰী কমিছে৷ সমগ্ৰ বছৰ যিমানেই মন্দা নহওক কিয় উৎসৱৰ সময়ত পূৰ্বে বাহনৰ বিক্ৰি বাঢ়ে৷ কিন্তু ২০২৪ চনৰ পৰিসংখ্যাত প্ৰকাশিত তথ্য অনুসৰি লাখ লাখ বাহন পৰি ৰৈছে শ্ব’ৰুমত৷ মূলত বাহনৰ দাম বৃদ্ধিৰ কাৰণেই সৰুগাড়ীৰ চাহিদা কমি গৈছিল৷ চলিত কৰ কাঠামোত ১২০০ চিচিৰ ক্ষমতাসম্পন্ন ইঞ্জিন আৰু ৪ মিটাৰৰ কম দৈৰ্ঘ্যৰ সৰু পেট্ৰল, এল পি জি আৰু চিএন জি বাহনত বৰ্তমান ২৮শতাংশ জিএছটি প্ৰযোজ্য আছিল৷ ইয়াৰোপৰি ১শতাংশ চেচ মিলাই মুঠ ২৯শতাংশ কৰ দিব লাগিছিল ক্ৰেতাই৷
১৫০০ চিচি বা তাতকৈ কম ইঞ্জিন ক্ষমতাসম্পন্ন আৰু ৪ মিটাৰৰ কম দৈৰ্ঘ্যৰ সৰু ডিজেল গাড়ীসমূহত ২৮শতাংশ জিএছটি আৰু ৩শতাংশ চেচ বহোৱা হৈছে৷ মুঠ কৰৰ পৰিমাণ হয়গৈ ৩১ শতাংশ৷ নতুন কাঠামোত ১০ শতাংশ কমি গৈ মুঠ ১৮শতাংশ কৰি দিব লাগিব এই দুই শ্ৰেণীৰ বাহনত৷ ইয়াৰ ফলত সৰু বাহনৰ বজাৰ আকৌ চলিবলৈ আৰম্ভ হব বুলি আশাবাদী গাড়ীবিক্ৰেতা সংস্থাসমূহ৷ কৰ ব্যৱস্থাৰ সৱলীকৰণে নতুনকৈ শ্ব’ৰুমমুখী কৰিব পাৰে ক্ৰেতাসকলক৷ জানি থওক কোন বাহনৰ কিমান দাম কমিব?
ভাৰতত বহুল প্ৰচলিত বাহন হৈছে মাৰুতি-ছুজুকিৰ বাহন৷ এই ব্ৰেণ্ডৰ বহুলবিক্ৰিত এটা মডেল হৈছে মাৰুতি ছুজুকি এল্ট কে-১০৷ পেট্ৰল ইঞ্জিনৰ হেচবেকৰ মাজত এই বিশেষ মডেলটিৰ চাহিদা আছে সমগ্ৰ দেশত৷ ব্যক্তিগত আৰু টেক্সি পৰিসেৱা উভয় ক্ষেত্ৰতেই ব্যৱহাৰ কৰা হয় এল্টক৷ পুনৰ্গঠিত জিএছটিৰ ফলত এল্ট কে-১০ৰ দাম কমিব৷ ইয়াৰ দাম ৪.২৩ লাখ টকা এক্স শ্বৰুম প্ৰাইজৰ পৰা কমি প্ৰায় ৩.৮১ লাখ টকা এক্স শ্বৰুম প্ৰাইজ হোৱাৰ সম্ভাৱনা আছে৷
ক্ৰেতাসকলৰ পছন্দৰ তালিকাত আছে হুণ্ডাই৷ ভাৰতৰ দ্বিতীয় বৃহৎ গাড়ী নিৰ্মাণকাৰী সংস্থাৰ জনপ্ৰিয় মডেলসমূহৰ ভিতৰত এখন হৈছে আই টেন নিঅ’৷ বাহনপ্ৰেমীৰ মনত আই টেন নিঅ’ৰ আছে বিশেষ কদৰ৷ ১.২ লিটাৰ ইঞ্জিনচালিত সৰু হেচবেকখনৰ দাম ৫.৯৮ লাখ টকা এক্স শ্বৰুম প্ৰাইজ৷ সেই দাম ৫.৫১ লাখ টকা এক্স শ্বৰুম প্ৰাইজলৈ নামি আহিব পাৰে বুলি ধাৰণা কৰিছে বাহন বিক্ৰেতাসকলে৷
কম দামত চেডান গাড়ীৰ চাবি ক্ৰেতাৰ হাতত তুলি দিছে জনপ্ৰিয় ছুইফট এণ্ড ডিজায়াৰ গাড়ীয়ে৷ চাৰি মিটাৰতকৈ সৰু কমপেক্ট বাহনখন ক্ৰেতাৰো খুবেই পছন্দৰ৷ এই বাহনৰ ওপৰতো নতুন হাৰত ১৮ শতাংশ জি এছ টি প্ৰযোজ্য হলে বাহনখনৰ দাম প্ৰায় ৬০,০০০ টকা কমি যোৱাৰ সম্ভাৱনা আছে৷ ডিজায়াৰৰ এক্স শ্বৰুম দাম প্ৰায় ৬ লাখ ৮৪ হাজাৰ টকা৷ সেই দাম কমি ৬ লাখ ২৪ হাজাৰ টকাৰ আশেপাশে হব পাৰে৷ ছুইফটৰ দাম কমি ৬লাখলৈ অহাৰ সম্ভাৱনা আছে৷
ইফালে SUVৰ ক্ষেত্ৰত কৰকাঠামো ৪০শতাংশ কৰা হৈছে৷ ১৫০০ চিচিৰ বেছি ইণ্ডিন ক্ষমতাসম্পন্ন আৰু ৪ মিটাৰতকৈ বেছি দৈৰ্ঘ্যৰ SUVখনত ২৮শতাংশ জি এছ টি আৰু ২২ শতাংশ চেচসহ ৫০শতাংশ হাৰত কৰ লোৱা হয়৷ চেচ তুলি ৪০শতাংশ কৰৰ আওঁতালৈ অনা হৈছে এছ ইউ ভিক৷ এইক্ষেত্ৰত ১০শতাংশ কৰ কমোৱাৰ ফলত এই বাহনসমূহৰ দামো কমাৰ আশা কৰিছে ক্ৰেতা আৰু বিক্ৰেতাই৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
