বুধবাৰৰ নিশাৰে পৰা আৰক্ষী ৰৈ আছে৷ চুমি আহিব, আত্মসমৰ্পন কৰিব৷ কিন্তু নাই যে নায়েই৷ প্ৰায় ১২ ঘণ্টা সময় উকলিল চুমি এতিয়াও অহা নাই৷ এটকা দুটকা নহয় কোটি কোটি টকাৰ কেলেংকাৰীত যুক্ত চুমিয়ে আত্মসমৰ্পন কৰিব বুলি বাতৰি প্ৰকাশ পাইছিল৷ সূত্ৰই খবৰ দিছিল মহানগৰীৰ ৩খন বিশেষ থানাৰ ভিতৰত কোনোবা এখনত চুমি আহি আত্মসমৰ্পন কৰিব৷ নিশাটো ৰৈ থাকিল ৩খন থানাৰ আৰক্ষী৷ এতিয়াও আশা এৰা নাই আৰক্ষীয়ে৷ চুমি আহিব৷
সূত্ৰই প্ৰকাশ কৰা খবৰ অনুসৰি চুমিয়ে বশিষ্ঠ, পল্টনবজাৰ বা নুনমাটি এই তিনি থানাৰ কোনোবা এখনত আত্মসমৰ্পন কৰাৰ আশংকা আছে৷ চুমিৰ লগতে আত্মসমৰ্পণ কৰিব চুমিৰ স্বামী তাৰ্কিকেও বুলি সূত্ৰটোৱে প্ৰকাশ কৰিছিল৷ ৩খন থানাতেই নিশাৰ ভাগত বঢ়াই দিয়া হৈছিল আৰক্ষী৷ অতিৰিক্ত মহিলা আৰক্ষীও মোতায়েন কৰা হৈছিল তিনিখন থানাত৷
চুমি উপস্থিত নোহোৱাত অৱশেষত বৃহস্পতিবাৰে পুৱাৰ ভাগত থানাৰ পৰা চমন জাৰি কৰা হৈছে৷ চুমি, তাৰ্কিক আৰু চুমিৰ ভাতৃ আৰু বৌয়েকক মষ্ট ৱাণ্টেড ঘোষণা কৰা হৈছে৷ আৰক্ষীয়ে এতিয়াও আশা কৰিছে চুমি সোনকালেই আত্মগোপন কৰা স্থানৰ পৰা ওলাই আহিব৷ মহানগৰীৰেই কোনো গোপন স্থানত চুমি আছে যদিও ক’ত আছে এতিয়াও ওলিয়াব পৰা নাই আৰক্ষীয়ে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
