এই প্ৰতিবেদনটো লিখাৰ পৰলৈ তেওঁৰ ইনষ্টাগ্ৰামত ফলোৱাৰ্ছ আছে প্ৰায় ২ কোটি ১৭ লাখ। ইনষ্টাগ্ৰামত তেওঁ কিন্তু কোনো নৃত্য প্ৰদৰ্শন নকৰে। নকৰে কোনো কৌতুক বা বিলাসী জীৱনৰ ভিডিঅ’। তেওঁ ক্ৰিকেটাৰ বা অভিনেতাও নহয়, কিন্তু তেওঁৰ কৰ্মই তেওঁক মানুহৰ মাজলৈ টানি নিয়ে, মানুহে আকৰ্ষিত হয়। তেওঁ দুৰ্গতসকলৰ ওচৰত সাহস হৈ থিয় দিয়ে। তেওঁৰ এই কৰ্মৰ কিছু অংশ কেমেৰাত বন্দী কৰি বিশ্ববাসীৰ আগত তুলি ধৰে। তেওঁৰ নাম হুছেইন মনছুৰী। সম্প্ৰতি তেওঁক সকলোৱে মানৱতাৰ দূত বুলি অভিহিত কৰিছে।
অসমৰ শেহতীয়া বান পৰিস্থিতিৰ পিছত উদ্ভৱ হোৱা দুৰ্দশাগ্ৰস্ত মানুহৰ কাষত থিয় দিও অসমবাসীৰ মাজত জনপ্ৰিয় হৈ পৰিল হুছেইন মনছুৰী। বৰ্তমানৰ ছ’চিয়েল মিডিয়াৰ যুগত অধিকাংশ কণ্টেণ্ট ক্ৰিয়েটৰে মনোৰঞ্জনমূলক বা বিলাসী জীৱনৰ ছবি-ভিডিঅ’ শ্বেয়াৰ কৰে। কিন্তু এই ভিৰৰ মাজতো সম্পূৰ্ণ ব্যতিক্ৰমী এজন ব্যক্তি হৈছে হুছেইন মনছুৰী। ভোকাতুৰক আহাৰ দিয়া, দুৰাৰোগ্য ৰোগীৰ কাষত থিয় দিয়া, বৃদ্ধ আৰু গৃহহীন লোকক সহায় কৰা, অসহায় শিশুৰ শিক্ষাৰ বাবে আগবাঢ়ি অহা আদি কামৰ বাবেই তেওঁ লাখ লাখ মানুহৰ হৃদয় জয় কৰিছে।
মুম্বাইৰ মাহিমত জন্মগ্ৰহণ কৰা হুছেইন মনছুৰীৰ শৈশৱ সহজ নাছিল। আৰ্থিক সংকটৰ মাজতে তেওঁ ডাঙৰ-দীঘল হোৱা মনছুৰী সৰুৰে পৰা পৰিয়ালক সহায় কৰিবলৈ বিভিন্ন কাম কৰিবলগীয়া হৈছিল। কাৰ্ডিনেল গ্ৰেচিয়াছ হাইস্কুলত শিক্ষা গ্ৰহণ কৰাৰ পিছত তেওঁ ৰিজভি কলেজৰ পৰা স্নাতক ডিগ্ৰী লাভ কৰে। পিছলৈ জেট এয়াৰৱেজ আৰু আতিথ্য উদ্যোগত চাকৰি কৰিছিল। এই অভিজ্ঞতাই সমাজৰ দুখ-কষ্ট আৰু দৰিদ্ৰ মানুহৰ জীৱন ওচৰৰ পৰা চাবলৈ তেওঁক সুযোগ দিয়ে।
ফটোগ্ৰাফী আৰু Story teller প্ৰতি থকা আগ্ৰহৰ ফলতেই তেওঁ ছ’চিয়েল মিডিয়াত যাত্ৰা আৰম্ভ কৰে। কিন্তু তেওঁ কেতিয়াও অভিনয় বা কৃত্ৰিমতা দেখুওৱাৰ চেষ্টা কৰা নাই। বাস্তৱ জীৱনৰ ঘটনা, মানুহৰ কষ্ট আৰু সহায়ৰ মুহূৰ্তবোৰেই তেওঁৰ কণ্টেণ্টৰ মূল বিষয়। সেই প্ৰামাণিকতাই তেওঁক লাখ লাখ অনুগামীৰ মাজত বিশেষ স্থান দিছে।
হুছেইন মনছুৰীয়ে টাটা মেম’ৰিয়েল হাস্পতালৰ কৰ্কট ৰোগী, গৃহহীন, বৃদ্ধ আৰু দৰিদ্ৰ শিশুসকলক নিয়মীয়াকৈ সহায় কৰে। ক’ভিড-১৯ মহামাৰীৰ সময়তো তেওঁ খাদ্য আৰু প্ৰয়োজনীয় সামগ্ৰী বিতৰণ কৰি বহু লোকৰ কাষত থিয় দিছিল। ধৰ্ম-বৰ্ণ নিৰ্বিশেষে সকলো মানুহক সমান দৃষ্টিৰে চোৱাৰ বাবে তেওঁ বিশেষভাৱে প্ৰশংসিত। হিন্দু দেৱ-দেৱীৰ পেলনীয়া ছবি সন্মানেৰে সংৰক্ষণ কৰা তেওঁৰ এটা ভিডিঅ’ই সাম্প্ৰদায়িক সম্প্ৰীতিৰ এক শক্তিশালী বাৰ্তা দিছিল।
হুছেইন মনছুৰীৰ জীৱনে এটা ডাঙৰ শিক্ষা দিয়ে—মানুহক সহায় কৰিবলৈ প্ৰচুৰ ধন-সম্পদ থকাৰ প্ৰয়োজন নাই। প্ৰয়োজন কেৱল ইচ্ছা শক্তি বা আগ্ৰহ। সৎ ইচ্ছা, সহানুভূতি আৰু মানৱতাৰ প্ৰতি দায়বদ্ধতাই এজন সাধাৰণ মানুহকো অসাধাৰণ কৰি তুলিব পাৰে। সেইবাবেই আজি হুছেইন মনছুৰীক বহুতে “মানৱতাৰ দূত” বুলি অভিহিত কৰে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
