নগাঁৱৰ আগশাৰী উচ্চ শিক্ষানুষ্ঠান আনন্দৰাম ঢেকিয়াল ফুকন মহাবিদ্যালয়ৰ অধ্যক্ষৰ বিৰুদ্ধে দুগৰাকীকৈ সহকাৰী অধ্যাপিকাই যৌন নিৰ্যাতনৰ গুৰুতৰ অভিযোগ উত্থাপন কৰিছে৷ এই অভিযোগৰ পিছতে সমগ্ৰ নগাঁৱৰ শৈক্ষিক মহলতে চাঞ্চল্যৰ সৃষ্টি হৈছে৷
উল্লেখ্য যে যোৱা শনিবাৰে মহাবিদ্যালয়খনৰ এগৰাকী ঠিকাভিত্তিক অধ্যাপিকাই অধ্যক্ষ ডঃ সুৰজিত কুমাৰ ভাগৱতীৰ বিৰুদ্ধে যৌন নিৰ্যাতনৰ অভিযোগ উত্থাপন কৰিছিল৷ যোৱা ৪ বছৰে ঠিকাভিত্তিকৰূপে কৰ্মৰত অধ্যাপিকাগৰাকীয়ে অভিযোগ কৰা মতে অধ্যক্ষ ডঃ ভাগৱতীয়ে চাকৰি নিয়মীয়াকৰণৰ প্ৰলোভন দি শাৰীৰিক সম্পৰ্ক স্থাপনৰ বাবে জোৰ দি আহিছিল৷
ইতিমধ্যে অধ্যাপিকাগৰাকীয়ে ডঃ ভাগৱতীৰ বিৰুদ্ধে নগাঁও সদৰ থানাত এজাহাৰ দাখিল কৰিছে৷
লগতে পঢ়ক দুবছৰৰ পিছত বহাগ বিহু : এইবাৰো হেঁপাহৰ বহাগ বিহুৰ আশাভংগ হ’ব অসমীয়াৰ!
ইফালে অধ্যক্ষ ডঃ সুৰজিত কুমাৰ ভাগৱতীয়ে এক ফে’চবুক প’ষ্ট যোগে তেওঁৰ বিৰুদ্ধে অধ্যাপিকাগৰাকীয়ে ভুৱা অভিযোগ অনা বুলি দাবী কৰিছে৷ অধ্যক্ষ ডঃ ভাগৱতীয়ে অলপতে অধ্যাপক পদৰ বাবে অনুষ্ঠিত সাক্ষাৎকাৰত উত্তীৰ্ণ নোহাৱাৰ বাবেই আক্ৰোশমূলকভাৱে অধ্যাপিকাগৰাকীয়ে এই অভিযোগ উত্থাপন কৰা বুলি দাবী কৰিছে৷ অধ্যাপিকাগৰাকীৰ বিৰুদ্ধে অধ্যক্ষ ডঃ ভাগৱতীয়েও সদৰ থানাত এক গোচৰ দাখিল কৰিছে৷
এই ঘটনাৰ চাঞ্চল্য মাৰ নৌযাওঁতেই একেগৰাকী অধ্যক্ষৰ বিৰুদ্ধে পুনৰ যৌন আতিশয্যৰ অন্য এক অভিযোগ উত্থাপন কৰিছে মহাবিদ্যালয়খনৰ আন এগৰাকী অধ্যাপিকাই৷ ছাত্ৰী হোষ্টেলৰ ৱাৰ্ডেনৰ দায়িত্বত থকা অধ্যাপিকাগৰাকীয়ে এইবাৰ অধ্যক্ষ ডঃ ভাগৱতীৰ বিৰুদ্ধে আৰু ভয়ংকৰ অভিযোগ উত্থাপন কৰিছে৷
দ্বিতীয়গৰাকী অধ্যাপিকাৰ অভিযোগ মতে অধ্যক্ষ ডঃ ভাগৱতীয়ে নিশা হঠাতে ছোৱালী হোষ্টেলত প্ৰৱেশ কৰি ছাত্ৰীসকলক অশ্লীল ইংগিত প্ৰদান কৰে৷ ইমানেই নহয় অধ্যক্ষগৰাকীয়ে নৈশ ক্লাছ পৰিদৰ্শনৰ নামত ক্লাছ ৰুমত হঠাতে প্ৰৱেশ কৰি শ্ৰেণীটো তদ্ৰূপ আচৰণ কৰে বুলি অধ্যাপিকাগৰাকীয়ে বিস্ফোৰক অভিযোগ কৰিছে৷
লগতে পঢ়ক ৰাণু মণ্ডলক বিয়া কৰাই বিপদত এক যুৱক! কিয় বিপদত পৰিছে যুৱকজন?
ইতিমধ্যে দ্বিতীয়গৰাকী অধ্যাপিকাইও অধ্যক্ষ ডঃ সুৰজিত কুমাৰ ভাগৱতীৰ বিৰুদ্ধে নগাঁও সদৰ থানাত এজাহাৰ দাখিল কৰিছে৷
কলেজখনৰ দুগৰাকীকৈ অধ্যাপিকাই অধ্যক্ষ ডঃ সুৰজিত কুমাৰ ভাগৱতীৰ বিৰুদ্ধে উত্থাপন কৰা যৌন নিৰ্যাতনৰ অভিযোগক লৈ এতিয়া সমগ্ৰ নগাঁও চহৰতে চাঞ্চল্যৰ সৃষ্টি হৈছে। আৰক্ষীৰ তদন্তত কোন সঁচা কোন মিছা স্পষ্ট হ’ব যদিও অধ্যক্ষ ডঃ সুৰজিত কুমাৰ বৰুৱাৰ বিৰুদ্ধে উত্থাপন হোৱা এই গুৰুতৰ অভিযোগে এতিয়া মহাবিদ্যালয়খনৰ গৰিমাকো ম্লান কৰিছে বুলি চৰ্চা চলিছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
