ডিফেণ্ডিং চেম্পিয়ন আৰ্জেণ্টিনাই পুনৰ এবাৰ ফিফা বিশ্বকাপ জয়ৰ দিশে আগবাঢ়ি থকাৰ মাজতেই দলটোৰ ফুটবল প্ৰশাসনক কেন্দ্ৰ কৰি আৰম্ভ হৈছে এক নতুন বিতৰ্ক। শেহতীয়াকৈ বিভিন্ন আন্তঃৰাষ্ট্ৰীয় সংবাদ মাধ্যমত প্ৰকাশ পোৱা বাতৰি অনুসৰি, আর্জেণ্টিনা ফুটবল এছ’চিয়েচন (AFA)ৰ বিভিন্ন আৰ্থিক লেনদেনৰ ওপৰত FBI আৰু ন্যায় বিভাগে প্ৰাথমিক তদন্ত আৰম্ভ কৰিছে। বিশেষকৈ ফক্স স্প’ৰ্টছ মেক্সিকোৰ উদ্ধৃতিৰে আৰ্জেণ্টিনাৰ এখন আগশাৰীৰ কাকত ‘লা নেচিয়ন’ৰ মতে, ক্লাউডিঅ’ টাপিয়াৰ নেতৃত্বত আৰ্জেণ্টিনা ফুটবল এছ’চিয়েশ্যনে আমেৰিকাৰ বিত্তীয় ব্যৱস্থাৰ জৰিয়তে লাখ লাখ ডলাৰ আগবঢ়াইছিল নেকি? কাক আগবঢ়াইছিল আৰু এনে বিত্তীয় কোনো লেনদেনে আমেৰিকাৰ আইন উলংঘা কৰিছিল নেকি সেই বিষয়ে তদন্তকাৰী সংস্থাই পৰীক্ষা কৰি আছে। ক্লডিঅ’ টাপিয়াৰ নেতৃত্বত আৰ্জেণ্টিনা ফুটবলে সাম্প্ৰতিক সময়ত অভূতপূৰ্ব সফলতা লাভ কৰিছে।
২০২২ চনৰ বিশ্বকাপ জয়ৰ পাছত দলটোৱে চলিত বিশ্বকাপতো এই পৰ্যন্ত শক্তিশালী প্ৰদৰ্শন আগবঢ়াইছে। কিন্তু দেশখনৰ লা নাচিঅন (La Nación) কাকতৰ প্ৰকাশিত প্ৰতিবেদনত কোৱা হৈছে হৈছে যে আমেৰিকাৰ তদন্তকাৰী সংস্থাই AFAৰ বাণিজ্যিক চুক্তি, স্পনছৰশ্বিপ আৰু আমেৰিকাত সম্পন্ন হোৱা বিভিন্ন আৰ্থিক ব্যৱস্থাৰ ওপৰত বিশেষভাৱে নজৰ ৰাখিছে। এই বাতৰি প্ৰকাশ পোৱাৰ লগে লগে ফুটবল বিশ্বত যথেষ্ট আলোড়নৰ সৃষ্টি হৈছে।
পূৰ্বেও বিতৰ্কৰ আওতালৈ আহিছিল AFA
উল্লেখযোগ্য যে, এই ঘটনাৰ পূৰ্বেও আৰ্জেণ্টিনা ফুটবলক কেন্দ্ৰ কৰি একাধিক বিতৰ্কৰ সৃষ্টি হৈছিল। ২০২৫ চনৰ ডিচেম্বৰত ছুৰ ফিনান্সাছ (Sur Finanzas) নামৰ এটা বিত্তীয় প্ৰতিষ্ঠানক কেন্দ্ৰ কৰি ধন সৰবৰাহ আৰু কৰ ফাঁকিৰ অভিযোগত আৰ্জেণ্টিনা চৰকাৰে আর্জেণ্টিনা ফুটবল এছ’চিয়েচনৰ মুখ্য কাৰ্যালয়ৰ লগতে কেইবাটাও ফুটবল ক্লাবত অভিযান চলাইছিল।
প্ৰায় ২৮৬৩ কোটি টকাৰ বিত্তীয় লেনদেন
সংশ্লিষ্ট সংবাদ মাধ্যমসমূহৰ তথ্য অনুসৰি, তদন্তকাৰী সংস্থাই আর্জেণ্টিনা ফুটবল এছ’চিয়েচনৰ সৈতে জড়িত প্ৰায় ২৬০ মিলিয়নৰ পৰা ৩০০ মিলিয়ন আমেৰিকান ডলাৰ(প্ৰায় ২,৮৬৩ কোটি টকা)ৰ লেনদেনৰ পৰ্যালোচনা কৰি আছে। এই ধনৰ একাংশ আমেৰিকাৰ কেইবাটাও বেংকৰ জৰিয়তে স্থানান্তৰ কৰা হৈছিল বুলি অভিযোগ উঠিছে। তদন্তৰ কেন্দ্ৰবিন্দুত আছে ফ্ল’ৰিডাস্থিত TourProdEnter LLC নামৰ এটা কোম্পানী, যিয়ে আর্জেণ্টিনা ফুটবল এছ’চিয়েচনৰ আন্তঃৰাষ্ট্ৰীয় বাণিজ্যিক চুক্তি আৰু আয় পৰিচালনা কৰিছিল বুলি সংশ্লিষ্ট সংবাদ মাধ্যত প্ৰকাশ কৰা হৈছে। ইয়াৰে কিছু ধনৰ লেনদেনৰ কোনো স্পষ্ট ব্যৱসায়িক উদ্দেশ্য নথকাৰ অভিযোগ উত্থাপন হৈছে।
অৱশ্যে বৰ্তমানলৈকে FBI বা আমেৰিকাৰ ন্যায় বিভাগে আর্জেণ্টিনা ফুটবল এছ’চিয়েচন অথবা ইয়াৰ কোনো বিষয়াৰ বিৰুদ্ধে কোনো আনুষ্ঠানিক অপৰাধমূলক অভিযোগ দাখিল কৰা নাই। তদন্তকাৰী সংস্থাই কেৱল নথি-পত্ৰ পৰীক্ষা, বেংক লেনদেনৰ বিশ্লেষণ আৰু সংশ্লিষ্ট ব্যক্তিৰ সাক্ষ্য সংগ্ৰহ কৰি আছে। কোৱাৰ্টাৰ ফাইনেলৰ দৰে গুৰুত্বপূৰ্ণ খেলৰ প্ৰস্তুতি চলি থকাৰ সময়তে আর্জেণ্টিনা ফুটবল এছ’চিয়েচনৰ বিৰুদ্ধে উত্থাপিত এই অভিযোগসমূহে ফুটবল জগতত নতুন প্ৰশ্নৰ উত্থাপন কৰিছে। সাম্প্ৰতিক সময়ত ইটোৰ পিছত সিটো সাফল্য আৰু ট্ৰফীৰে বিশ্ব ফুটবলত আধিপত্য বিস্তাৰ কৰা আর্জেণ্টিনা ফুটবল এছ’চিয়েচনৰ বাবে এতিয়া ক্ৰীড়া সাফল্যৰ লগতে স্বচ্ছতা, সুশাসন আৰু বিত্তীয় লেনদেনৰ বিষয়সমূহো সমানে গুৰুত্বপূৰ্ণ হৈ পৰিছে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
