অমল মজুমদাৰলৈ মনত আছেনে? আছেনে মনত অভিজিৎ কাৰ্লেৰ দৰে দুৰ্দান্ত ভাৰতীয় ক্ৰিকেটাৰৰ কথা? ঘৰুৱা খেলত ৰানৰ পাহাৰ গঢ়াৰ পাছতে এওঁলোকে কাহানিও পিন্ধি নাপালে টীম ইণ্ডিয়াৰ জাৰ্চী৷ মুম্বাইৰ প্ৰতিভাবান ক্ৰিকেটাৰ ছৰফৰাজ খানক লৈও একেই প্ৰশ্ন উঠিছিল৷ ঘৰুৱা ক্ৰিকেটত অভিলেখসংখ্যক ৰান কৰাৰ পাছতো বাৰে বাৰে টীম ইণ্ডিয়াত স্থান দখলত ব্যৰ্থ হৈছিল ২৬ বছৰীয়া ছৰফৰাজ৷ সুনীল গাভাস্কাৰৰ দৰে প্ৰবাদপ্ৰতিম ক্ৰিকেটাৰে ছৰফৰাজক জাতীয় দলত স্থান নিদিয়াৰ বাবে ক্ষোভ প্ৰকাশ কৰাৰ দৰে ঘটনাও ঘটিছিল৷ অৱশেষত বহু প্ৰতীক্ষাৰ অন্তত ইংলেণ্ডৰ বিৰুদ্ধে ১৫ ফেব্ৰুৱাৰী বৃহস্পতিবাৰে ৰাজকোটৰ টেষ্ট ছিৰিজৰ তৃতীয় মেচত অভিষেক ঘটে ছৰফৰাজৰ৷
প্ৰথম ইনিংছতেই দুৰন্ত বেটিং৷ ছৰফৰাজৰ বেটিঙত মুগ্ধ দেশবাসী৷ কেৱল শকত হোৱাৰ বাবেই জাতীয় দলত স্থান নোপোৱা ছৰফৰাজ খান খেলখনৰ দুয়োটা ইনিংছত বেটিঙৰে উজলি উঠিছিল৷ চৌদিশে কোবাই খেলিছিল মুম্বাইৰ ক্ৰিকেটাৰগৰাকীয়ে৷ ভাৰতৰ দিগগজ ক্ৰিকেটাৰ অনিল কুম্বলেই যেতিয়া ছৰফৰাজৰ হাতত ডেবিঅ’ কাপ তুলি দিছিল তেতিয়া সৃষ্টি হৈছিল এক আৱেগিক পৰিৱেশ৷ ভিডিঅ’ত স্পষ্টভাৱে দেখা গৈছিল ছৰফৰাজ আৰু তেওঁৰ পিতৃ নৌচাদ আৱেগিক হৈ পৰিছিল৷ এই আৱেগিক মুহূৰ্তই দেশৰ চুকে-কোণে বহুতৰে চকুলো নিগৰাইছিল৷ কিয়নো, ছৰফৰাজ খানক এজন ক্ৰিকেটাৰৰূপে গঢ় দিয়াত পিতৃ নৌচাদৰ আছিল অনবদ্য অৱদান৷ অভাৱ-অনাটনত ভোগা নৌচাদে সকলো ত্যাগ কৰি ছৰফৰাজক ক্ৰিকেটাৰ হিচাপে গঢ়ি তুলিছিল৷ কিন্তু, জাতীয় দলত স্থান পাবলৈ বছৰৰ পাছত বছৰ ধৰি অপেক্ষা কৰিবলগীয়া হৈছিল মুম্বাইৰ প্ৰতিভাধৰ ক্ৰিকেটাৰগৰাকীয়ে৷
পুত্ৰ আৰু পিতৃৰ আৱেগিক মুহূৰ্তৰ দৃশ্যত বিচলিত মাহিন্দা
ৰে’লত চকলেট–চানা বিক্ৰী কৰি জীৱন নিৰ্বাহ কৰা নৌচাদে পুত্ৰক এনে এটি পৰ্যায়লৈ লৈ যোৱাৰ বাবে ভাৰতৰ অন্যতম খ্যাতনামা উদ্যোগপতি আনন্দ মাহিন্দাই x মাধ্যমত এটা প’ষ্ট কৰে৷ প’ষ্টটো লগে লগে ভাইৰেল হ’বলৈ আৰম্ভ কৰে৷ ছৰফৰাজৰ ভিডিঅ’ এটা প’ষ্ট কৰি উদ্যোগপতিগৰাকীয়ে লিখিছে—সাহস নেহেৰুৱাব…৷ এজন পিতৃৰ সন্তানক অনুপ্ৰাণিত কৰাৰ এই গুণ আৰু কি হ’ব পাৰে! সেয়ে নৌচাদ খানক এখন থাৰ উপহাৰ দিবলৈ বিচাৰিছে উদ্যোগপতি আনন্দ মাহিন্দাই৷ ছৰফৰাজ খানৰ পিতৃয়ে থাৰখন উপহাৰ হিচাপে ল’লে তেওঁ সৌভাগ্য আৰু সন্মানৰ বিষয় হ’ব বুলিও xৰ প’ষ্টত উল্লেখ কৰে উদ্যোগপতি মাহিন্দাই৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
