অসম লাইভ২৪ঃ আজি শিশু দিৱস। ভাৰতবৰ্ষত জৱাহৰলাল নেহৰুৰ জন্মদিনটোক শিশু দিৱস হিচাপে পালন কৰা হয়। পণ্ডিত জৱাহৰলাল নেহৰুৱে খুব ভালপায়ছিল শিশুক, যাৰ বাবে তেওঁৰ ওপজা দিনটোক শিশুদিৱস হিচাপে পালন কৰা হয়।
আজিৰ শিশু কাইলৈ দেশৰ ভৱিষ্যত, অৰ্থাৎ প্ৰত্যেকটো শিশুৱেই একো একোটা মানৱ সম্পদ। এই শিশু সকলক সঠিক আৰু নিৰাপদ পৰিৱেশত ডাঙৰ-দীঘল কৰি ভৱিষ্যতলৈ একোজন কৰ্তব্য পৰায়ণ আৰু দ্বায়িত্বশীল নাগৰিকৰূপে গঢ় দিয়াৰ দায়িত্ব আমাৰ প্ৰত্যেকৰেই। শিশু সকলৰ বাবেই আজিৰ দিনটোক উদযাপন কৰা হয়।
দেশৰ প্ৰথমগৰাকী প্ৰধানমন্ত্ৰী পণ্ডিত জৱাহৰলাল নেহৰুৰ জন্মদিন। পণ্ডিত নেহৰুৰ আছিল শিশুৰ প্ৰতি এক বিশেষ প্ৰীতি। পণ্ডিতগৰাকীয়ে অনুধাৱন কৰিছিল দেশৰ সুস্থ আৰু সুৰক্ষিত ভৱিষ্যতৰ ক্ষেত্ৰত শিশুসকলৰ ভূমিকা কিমান? আনহাতে, শিশুসকলৰ মাজত পণ্ডিত নেহৰু জনপ্ৰিয় আছিল ‘নেহৰু চাচা’ হিচাপে। এই বিশেষ দিনটোত সমগ্ৰ দেশৰ লগতে আমাৰ ৰাজ্যতো দেখা গৈছে আয়োজন। ৰাজ্যৰ বিভিন্ন প্ৰান্তৰ বিদ্যালয়সমূহত অনুষ্ঠিত কৰা হৈছে শিশু দিৱসৰ কাৰ্যসূচী। নেহৰুৱে তাহানিতেই কৈছিল, আজিৰ শিশুৱেই নতুন ভাৰত গঢ়িব, আমি শিশুসকলক যত্নৰে লালন-পালন কৰিব লাগে, তেতিয়া সুস্থ এটা প্ৰজন্ম গঢ়ি উঠিব, দেশ উন্নতিৰ পথত আগবাঢ়িব। সেয়ে শিশুৰ এই বিশেষ দিনটো পালন কৰি শিশু কল্যানৰ কথাবোৰ দেশৰ চুকে কোণে বিয়পায় দিব লাগে। প্ৰকৃততে শিশু দিৱসৰ মূল উদ্দেশ্যই হৈছে শিশুৰ চাহিদাসমূহক স্বীকৃতি দিয়া, তেওঁলোকৰ অধিকাৰ সুৰক্ষিত কৰা, তেওঁলোকৰ ওপৰত চলি থকা যিকোনো শোষণ ৰোধ কৰা এইসমূহৰ মাজেৰে এটি শিশুক সঠিকভাৱে প্ৰতিষ্ঠিত কৰোৱাই এই দিৱস পালনৰ মুখ্য উদ্দেশ্য।
উল্লেখ্য যে যদিও বছৰে বছৰে শিশু দিৱস পালন কৰা হয় তথাপিও সত্য এয়াই যে আমাৰ দেশত আজিও হাজাৰ হাজাৰ শিশু শ্ৰমিক আছে। তেওঁলোক শিক্ষাৰ অধিকাৰৰ পৰা বঞ্চিত হৈছে। শিশুশ্ৰমৰ সমস্যা দেশৰ প্ৰতিটো ৰাজ্যৰেই এটা প্ৰধান সমস্যা। এই শিশু দিৱসত সকলোৰে প্ৰতিজ্ঞা হওক, শিশু নিৰ্যাতন, শিশু শ্ৰমিক দেশৰ ভূমিত শেষ হওক, সকলো শিশুৱেই আনুষ্ঠানিক শিক্ষাৰে শিক্ষিত হওক, নেহৰুৱে তাহানিতে কোৱাৰ ধৰণেৰে, শিক্ষাৰ পোহৰেৰে উদ্ভাসিত এজাক শিশুৱে পোহৰাই তোলক দেশৰ ভৱিষ্যত।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
