মাতৃয়ে কাম কৰে কয়লাখনিত৷ কৰ’নাৰ বাবে তেওঁ বিসৰ্জন দিব লগা হৈছিল UPSCৰ সপোনো৷ দিল্লীৰ সৰোজিনি নগৰৰ ফুটপাথৰ পৰা মিটাৰ কাপোন ক্ৰয় কৰি কাপোৰ ডিজাইন দি চিলোৱা এইগৰাকী যুৱতী এদিন কাঁ মহোৎসৱত উজলি উঠিব সেই কথা কোনোৱে কল্পনাও কৰিব পৰা নাছিল৷ নিজে চিলোৱা গাউন পিন্ধি কাঁৰ ৰেড কাৰ্পেটত সকলোৰে নজৰ কাঢ়িছে৷ কাঁৰ ৰঙা দলিচা মানেই ফেশ্ব্যন ফিৰিস্তি৷ লাখ লাখ টকীয়া পোছাক পিন্ধি এই ৰঙা কাৰ্পেটত খোজ দিয়ে নামী-দামী তাৰকাই৷ সেই নামী-দামী তাৰকাৰ সৈতে খোজ মিলাই এই ৰঙা দলিছাত খোজ দিলে কয়লা খনিৰ শ্ৰমিকৰ সন্তান নেনচি ত্যাগীয়ে৷ নেনচিয়ে নিজৰ কৰ্মৰ জোৰতেই এই স্থানত ভৰি দিবলৈ সক্ষম হৈছে৷
তেওঁ ভাৰতীয় ফেশ্ব্যন ব্লগাৰ নেনচি ত্যাগী৷ উত্তৰ প্ৰদেশৰ সৰু এখন গাঁৱৰ পৰা ওলাই আহিছে নেনচি৷ ইংৰাজীৰ সৈতে দূৰ-দুৰণিলৈকে সম্পৰ্কই নাছিল নেনচিৰ৷ কিন্তু ভাষা কাহানিও কোনো ক্ষেত্ৰতেই হেঙাৰ নহয় সেই কথাকেই প্ৰমাণ কৰি ফ্ৰান্সলৈ লৈ উৰা মাৰিলে নেনচি৷ ফ্ৰান্সৰ ৰিভিয়েৰালৈ যাত্ৰা কৰাৰ সময়ত নেনচিৰ সাৰথি আছিল কেৱল অলপমান আত্মবিশ্বাস৷ সেই আত্মবিশ্বাস সামৰিয়েই ৰেড কাৰ্পেটত খোজ দিলে নেনচিয়ে৷ নিজ হাতে ডিজাইন কৰা গোলপীয়া গাউন পিন্ধি খোজ দিলে নেনচিয়ে৷ এই বিশেষ গাউনৰ ওজন আছিল প্ৰায় ২০ কিঃগ্ৰাঃ৷
কাঁলৈ যাবৰ বাবেই এই স্পেছিয়েল গোলপীয়া গাউন নেনচিয়ে নিজ হাতে তৈয়াৰ কৰিছিল৷ মুঠ ১০০০ মিটাৰ কাপোৰ লাগিছে এই বিশেষ গাউন তৈয়াৰ কৰাৰ বাবে৷ নিজৰ এমাহৰ পৰিশ্ৰমৰ ফচল এই গোলপীয়া গাউন৷ পশ্চিমী বিনোদন ক্ষেত্ৰৰ ফটোগ্ৰাফাৰৰ দৃষ্টি নেনচিতেই যেন ৰৈ গ’ল৷ নেনচিয়ে খোজ দিয়াৰ সময়ত কেমেৰাৰ ফকাচ কেৱল নেনচিৰ ওপৰত৷ নেনচিয়ে ৰেড কাৰ্পেটৰ পৰা ওলাই অহাৰ পাছতেই বহু বিদেশী মিডিয়াই ঘেৰি ধৰিলে নেনচিক৷ ল’লে এটাৰ পাছত আনটো সাক্ষাৎকাৰ৷ কিন্তু তাত কিছু অসুবিধাও আহিল৷ নেনচিয়ে ইংৰাজী ক’ব নাজানে৷ বিদেশী সাংবাদিকৰ প্ৰশ্নৰ উত্তৰ হিন্দীতেই দি গ’ল নেনচিয়ে৷
নেনচিয়ে বিদেশী মিডিয়াক দিয়া সাক্ষাৎকাৰ ইংৰাজী ছাবটাইটেল লগাই শ্বেয়াৰ কৰিছে বিদেশী বিনোদন মিডিয়াই৷ তাতেই নেনচিয়ে কৈছে, ‘হাজাৰ মিটাৰ কাপোৰ দি নিজে তৈয়াৰ কৰা গাউন পিন্ধি কাঁৰ দলিচাত অহা এই যাত্ৰা মোৰ সহজ নাছিল৷ কিন্তু এই যাত্ৰাৰ প্ৰস্তুতিৰ পৰা বৰ্তমানলৈকে প্ৰতিটো ক্ষণেই মোৰ বাবে মূল্যবান৷ মোৰ সপোন পূৰণ হ’ল৷’
চিলাই মেচিনকেই সম্বল কৰি কাঁলৈ যোৱা দুসাহসী নেনচিৰ অভাৱী জীৱনৰ কথাও এতিয়া চৰ্চাত আহিছে৷ আই এ এছ হোৱাৰ সপোন পূৰণ কৰিবলৈকে দিল্লী আহিছিন নেনচি৷ মাতৃয়ে কাম কৰিছিল কয়লাখনিত৷ মাতৃৰ কষ্ট কমাবলৈকে নেনচিয়ে সন্ধান কৰিছিল কৰ্মৰ৷ লকডাউনত ছচিয়েল মিডিয়াত ভৰি দিয়ে নেনচিয়ে৷ পঢ়াশুনাৰ বাবে ঘৰৰ পৰা জমা কৰা ধনেৰে কেমেৰা ক্ৰয় কৰে নেনচিয়ে৷ সেই কেমেৰাৰে ৰীল বনোৱা আৰম্ভ কৰে৷ নেনচিয়ে চিলাইৰ বাবে কোনো প্ৰশিক্ষণ কাহানিও লোৱা নাছিল৷ সৰুতে পুতলাৰ বাবে সৰু সৰু কাপোৰ চিলাইছিল মাতৃৰ কাষত বহি৷ সেই টেলেণ্টেৰেই বিশেষ পোছাক চিলাই কৰি উলিয়াইছিল নেনচিয়ে৷ এইবাৰ সেই কাপোৰ পিন্ধি সপোনে উৰা মাৰিলে৷ নভৱা দূৰত্ব, নেদেখা সপোনৰ কান্ধত উঠি কাঁৰ নামী দামী তাৰকাৰ চকুত জিলিকি উঠিল নেনচি৷ নেনচি এতিয়া এক নাম নহয় নেনচি হৈ পৰিল এগৰাকী ইণ্টাৰনেশ্ব্যনেল ডিজাইনাৰ৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
