অসম লাইভ২৪ঃ সমাজৰ বিভিন্ন লোকবিশ্বাস যে যুৰীয়া কল খালেই যমজ সন্তানৰ জন্ম হয়। বিজ্ঞানে যদিও ইয়াৰ অন্ধবিশ্বাস বুলিয়েই কৈ আহিছে তেনে ক্ষেত্ৰত এই বিষয়টো আজিও কিয় আমাৰ সমাজত প্ৰচলিত হৈ আছে? প্ৰকৃততে কেনেকৈ যমজ সন্তানৰ জন্ম হয়? এই বিষয় সন্দৰ্ভত জানিবলৈ বহুতেই আগ্ৰহী হৈ থাকে।
যমজ সাধাৰণতে দুই প্ৰকাৰৰ। বিজ্ঞানৰ ভাষাত আইডেণ্টিকেল আৰু নন- আইডেণ্টিকেল। সাধাৰণতে আইডেণ্টিকেল যমজ সন্তান জন্ম হয় এটা জাইগোটৰ পৰা আৰু নন-আইডেণ্টিকেল যমজৰ জন্ম হয় পৃথক জাইগোটৰ পৰা। এইখিনিতেই প্ৰশ্ন হয় জায়গোট কি?
সহজ অৰ্থত জাইগোট হৈছে পুৰুষৰ শুক্ৰাণুয়ে যেতিয়া স্ত্ৰীৰ ডিম্বানুত প্ৰবেশ কৰে তেতিয়া দুটি কোষ এটা হৈ এটা একক কোষৰ সৃষ্টি কৰে। ইয়াকেই জাইগোট বুলি কোৱা হয়। অৰ্থাৎ প্ৰাণৰ সূচনা হয় সেই একক কোষটোতেই। এই জাইগোটতো বাৰে বাৰে বিভাজিত হৈ একধৰণৰ কোষগুচ্ছ ভিতৰতেই তৈয়াৰ হয়। যি পুনৰ বিভাজিত হৈ ভ্ৰুণ তৈয়াৰ কৰে। এই ভ্ৰুণৰ পৰাই একোটা শিশুৱে জন্মলাভ কৰে।
সাধাৰণতে এটা জাইগোটৰ পৰা এটা শিশুৱেই জন্মলাভ কৰে। কিন্তু কিছু ক্ষেত্ৰত এটা জাইগোট বিভাজিত হৈ জৰায়ুৰ অন্য কোনো স্থানত পৃথক ভ্ৰুণ তৈয়াৰ কৰেগৈ। অৰ্থাৎ এটা জাইগোটৰ পৰাই দুটা ভ্ৰুণ তৈয়াৰ হয়। এনেদৰে জন্ম হোৱা শিশুক আইডেণ্টিকেল যমজ বুলি কোনা হয়। কাৰণ এই দুই শিশুৰ জাইগোট একেটাই। অৰ্থাৎ দুয়োৰে মাজত জিনগত বিভেদ নাই। সাধাৰণতে এনেদৰে জন্ম হোৱা সন্তান দুটি দেখাতো হুবহু একেই হয়।
আনহাতে যমজ কেতিয়াবা অন্যভাৱেও হয়। সাধাৰণতে প্ৰতিমাহে ডিম্বাশয়ত মাত্ৰ এটাহে ডিম্বানু তৈয়াৰ হয়। কিন্তু কেতিয়াবা এটা ডিম্বাশয়তেই দুটা ডিম্বানুৰ সৃষ্টি হয়। এই দুটা ডিম্বানুৰ একেলগে নিষেচন হ’লে যমজ সন্তানৰ জন্ম হয়। এই ক্ষেত্ৰত দুটা পৃথক জাইগোটতহে দুটা কোষৰ পৰা দুটা ভ্ৰুণৰ সৃষ্টি হয়। এনেদৰে জন্ম হোৱা যমজক নন-আইডেণ্টিকেল যমজ বুলি কোৱা হয়। নন আইডেণ্টিকেল যমজ দেখাত পৃথক হ’ব পাৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
