বুধবাৰে নিশা অসম আৰক্ষীৰ এটা দলে গুজৰাটৰ আহমদাবাদৰ পৰা কংগ্ৰেছ বিধায়ক তথা দলিত নেতা জিগনেশ মেৱানীক গ্ৰেপ্তাৰ কৰিছে৷ যোৱা নিশা প্ৰায় ১.৩০ বজাত কংগ্ৰেছ বিধায়কজনক গ্ৰেপ্তাৰ কৰি অসম আৰক্ষীয়ে অসমলৈ আনি আদালতত হাজিৰ কৰোৱাৰ কথা৷
এতিয়া প্ৰশ্ন হ’ল অসম আৰক্ষীয়ে ইমান তৎপৰতাৰে কিয় গুজৰাটৰ কংগ্ৰেছ বিধায়কগৰাকীৰ গ্ৰেপ্তাৰ কৰিলে? প্ৰকাশিত বাতৰি মতে জিগনেশ মেৱানীয়ে প্ৰধানমন্ত্ৰী নৰেন্দ্ৰ মোদীৰ সম্পৰ্কে কৰা এটা টুইটৰ বাবে অসম আৰক্ষীয়ে গ্ৰেপ্তাৰ কৰিছে৷
বিধায়ক মেৱানীৰ টুইটটোৰ বিৰুদ্ধে কোকৰাঝাৰ বিজেপিৰ এগৰাকী নেতা অৰূপ কুমাৰ দে’এ কোকৰাঝাৰ আৰক্ষী থানাত এক গোচৰ দাখিল কৰিছিল আৰু আৰক্ষীয়ে উক্ত গোচৰৰ ভিত্তিতে অতি তৎপৰতাৰে গুজৰাটৰ কংগ্ৰেছ বিধায়কগৰাকীৰ গ্ৰেপ্তাৰ কৰিছে৷
লগতে পঢ়ক ভয়াৱহ অগ্নিকাণ্ড : অগ্নিদগ্ধ হৈ মৃত্যু এটা পৰিয়ালৰে ৭ গৰাকী লোকৰ
‘‘কোকৰাঝাৰ আৰক্ষীয়ে বেড়গামৰ কংগ্ৰেছ বিধায়ক জিগনেশ মেৱানীক পালানপুৰ আৱৰ্ত ভৱনৰ পৰা গ্ৰেপ্তাৰ কৰিছে৷’’ সংবাদ সংস্থা এনআইএ কোকৰাঝাৰ আৰক্ষী অধীক্ষক থুবে প্ৰতীক বিজয় কুমাৰৰ উদ্ধৃতিৰে এইদৰে প্ৰকাশ কৰিছে৷
বিধায়ক জিগনেশ মেৱানীৰ বিৰুদ্ধে তথ্য প্ৰযুক্তি আইনৰ অধীনত অপৰাধমূলক ষড়যন্ত্ৰ, দুই সম্প্ৰদায়ৰ মাজত শত্ৰুতা বৃদ্ধি, উদ্দেশ্যপ্ৰণোদিতভাৱে শান্তি বিঘ্নিত কৰিবলৈ চেষ্টা কৰা আদি অভিযোগ অনা হৈছে৷
ইফালে যি দুটা টুইটৰ বাবে জিগনেশ মেৱানীক কোকৰাঝাৰ আৰক্ষীয়ে গ্ৰেপ্তাৰ কৰিছে সেই দুয়োটা টুইট টুইটাৰে আইনী সংক্ৰান্তীয় কাৰণত ইউথেল্ড কৰি ৰাখিছে, যাৰ বাবে দুয়োটা টুইট এতিয়া উপলব্ধ নহয়৷ বিধায়কগৰাকীয়ে এই দুয়োটা বিতৰ্কিত টুইট যোৱা ১৮ এপ্ৰলিত কৰিছিল৷
লগতে পঢ়ক জঘন্য! ১৩ বছৰীয়া কিশোৰীক ধৰ্ষণ ৮০ গৰাকী লোকৰ, ৭৪ গৰাকীক গ্ৰেপ্তাৰ
কোকৰাঝা আৰক্ষীয়ে ৰুজু কৰা গোচৰত উল্লেখ থকা মতে বিধায়ক জিগনেশ মেৱানীৰ টুইট দুটা নাথুৰাম গডছেৰ সৈতে তুলনা কৰি প্ৰধানমন্ত্ৰী নৰেন্দ্ৰ মোদীক কটাক্ষ কৰা হৈছিল৷
উল্লেখ্য যে দলিত নেতা জিগনেশ মেৱানীয়ে নিৰ্দলীয় প্ৰাৰ্থী হিচাপে বিধায়ক নিৰ্বাচিত হোৱাৰ পিছত বিগত বৰ্ষত কংগ্ৰেছ দলত যোগদান কৰিছিল৷
ইফালে অসম আৰক্ষীয়ে গুজৰাটৰ কংগ্ৰেছ বিধায়কগৰাকীক গ্ৰেপ্তাৰ কৰা কাণ্ডক কংগ্ৰেছে তীব্ৰ গৰিহণা দিয়াৰ লগতে প্ৰতিবাদ সাব্যস্ত কৰিছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
