গাখীৰ এবিধ ভৰপূৰ পুষ্টিসমৃদ্ধ এক উৎকৃষ্ট খাদ্য। হয়তো গাখীৰ দৈনিকভাৱে ব্যৱহাৰ নকৰা ঘৰ খুব কমেই ওলাব। বিশেষকৈ ভাৰতীয় গৃহিনীৰ পাকঘৰৰ গাখীৰ এবিধ নিত্যব্যৱহাৰ্য সামগ্ৰী। গাখীৰ শিশু, প্ৰাপ্তবয়স্ক আৰু বৃদ্ধ—সকলো বয়সৰ মানুহৰ দৈনন্দিন খাদ্যত এক গুৰুত্বপূৰ্ণ অংশ। চাহ, কফি, দৈ, পনীৰ আৰু বিভিন্ন খাদ্য প্ৰস্তুত কৰাতো গাখীৰ বহুলভাৱে ব্যৱহাৰ কৰা হয়। কিন্তু গাখীৰ সহজে নষ্ট হোৱা খাদ্যবস্তুৰ ভিতৰত অন্যতম। সেয়েহে ইয়াৰ গুণাগুণ অক্ষুণ্ণ ৰাখিবলৈ সঠিকভাৱে সংৰক্ষণ কৰাটো অত্যন্ত প্ৰয়োজনীয়।
গাখীৰত প্ৰ’টিন, কেলচিয়াম, ফছফৰাছ, পটাছিয়াম, ভিটামিন বি-১২, ৰাইবোফ্লেভিন আৰু ফৰ্টিফাইড আদি বহু প্ৰয়োজনীয় পুষ্টি উপাদান থাকে গাখীৰত। গাখীৰত আৰ্দ্ৰতা আৰু পুষ্টি অধিক থকাৰ বাবে ইয়াত বেক্টেৰিয়া দ্ৰুতগতিত বৃদ্ধি পাব পাৰে। যদি গাখীৰ দীঘলীয়া সময় কোঠাৰ উষ্ণতাত ৰাখি থোৱা হয়, বাৰে বাৰে গৰম কৰা হয় বা সঠিকভাৱে সংৰক্ষণ কৰা নহয়, তেন্তে ই সোনকালে নষ্ট হোৱাৰ আশংকা বৃদ্ধি পায়।
গাখীৰ দীঘলীয়া সময়লৈকে কেনেকৈ সতেজ ৰাখিব?
গাখীৰ উতলাই লোৱাৰ পিছত বহু সময় কোঠাৰ উষ্ণতাত ৰাখি নথব। অলপ ঠাণ্ডা হ’লেই পৰিষ্কাৰ ঢাকনি থকা ষ্টীল বা খাদ্য-মানদণ্ডৰ পাত্ৰত ভৰাই লগে লগে ফ্ৰিজত ৰাখিব। ফ্ৰিজৰ দুৱাৰৰ চেলত নহয়, ভিতৰৰ শ্বেল্ফত গাখীৰ ৰাখিব। তাত তাপমাত্ৰা অধিক স্থিৰ থাকে। প্ৰয়োজন অনুসৰিহে গাখীৰ উলিয়াই ব্যৱহাৰ কৰিব। বাৰে বাৰে গাখীৰ গৰম কৰাৰ পৰা বিৰত থাকিব। গাখীৰ উলিয়াওঁতে সদায় পৰিষ্কাৰ আৰু শুকান চামুচ বা পাত্ৰ ব্যৱহাৰ কৰিব, যাতে বেক্টেৰিয়াৰ বৃদ্ধি নহয়। যদি পেকেটজাত গাখীৰ হয়, তেন্তে খোলাৰ পিছত ভালদৰে বন্ধ কৰি ৰাখিব। সঠিকভাৱে সংৰক্ষণ কৰিলে গাখীৰৰ সতেজতা আৰু গুণগত মান বহুদিনলৈকে অক্ষুণ্ণ ৰাখিব পাৰি।
গাখীৰ কিমান তাপমাত্ৰাত আৰু কিমান সময় সংৰক্ষণ কৰিব?
গাখীৰ ৪° চেলচিয়াছ বা তাতকৈ কম তাপমাত্ৰাত ফ্ৰিজত সংৰক্ষণ কৰাটো উত্তম। উতলোৱা গাখীৰ ঠাণ্ডা হোৱাৰ পিছত যিমান সোনকালে সম্ভৱ ফ্ৰিজত ৰাখিব লাগে। যদি গাখীৰ বহু সময় কোঠাৰ উষ্ণতাত থাকে, তেন্তে ইয়াত বেক্টেৰিয়া দ্ৰুতগতিত বৃদ্ধি পাব পাৰে। ফ্ৰিজত ৰখা গাখীৰো পেকেটত উল্লেখ কৰা ব্যৱহাৰৰ সময়সীমা বা ম্য়াদ উত্তীৰ্ণৰ তাৰিখৰ ভিতৰতে ব্যৱহাৰ কৰা উচিত। যদি গাখীৰৰ ৰং, সোৱাদ বা গোন্ধত পৰিবৰ্তন দেখা যায়, তেন্তে সেই গাখীৰ খোৱা উচিত নহয়।
এই ভুলবোৰ এৰাই চলক
গাখীৰ বহু সময় ধৰি খোলা অৱস্থাত বাহিৰত ৰাখি নাথাকিব। বাৰে বাৰে গৰম কৰি পুনৰ ঠাণ্ডা কৰাৰ অভ্যাস পৰিহাৰ কৰিব। লেতেৰা বা ভিজা পাত্ৰত গাখীৰ নাৰাখিব, কিয়নো তেনে কৰিলে গাখীৰ সোনকালে নষ্ট হ’ব পাৰে। ফ্ৰিজত গাখীৰ তীব্ৰ গোন্ধ থকা খাদ্যবস্তুৰ কাষত নাৰাখিব, কাৰণ গাখীৰে সহজেই আন খাদ্যৰ গোন্ধ শুহি লয়। যদি গাখীৰ ফাটি যায়, টেঙা গোন্ধ ওলায় বা ৰং সলনি হয়, তেন্তে সেই গাখীৰ কোনোপধ্যেই ব্যৱহাৰ বা সেৱন কৰা উচিত নহয়। সঠিক পদ্ধতিত সংৰক্ষণ কৰিলে গাখীৰ দীঘলীয়া সময়লৈকে সতেজ, পুষ্টিকৰ আৰু খোৱাৰ বাবে নিৰাপদ হৈ থাকে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
