প্ৰধানমন্ত্ৰীৰ গাদী হেৰুওৱাৰ পিছৰে পৰা ইটোৰ পিছত সিটো বিপদে নেৰা হৈছে পাকিস্তানৰ প্ৰাক্তন প্ৰধানমন্ত্ৰী ইমৰাণ খানক৷
প্ৰাক্তন প্ৰধানমন্ত্ৰী ইমৰাণ খানৰ বিৰুদ্ধে কিছুদিন পূৰ্বে উপহাৰ হিচাপে লাভ কৰা বিলাসী নেকলেচ বিক্ৰীৰ অভিযোগ তুলি তদন্ত আৰম্ভ হোৱাৰ পিছতে ধৰ্মদ্ৰোহৰ অভিযোগো উত্থাপন কৰা হৈছিল৷
ইয়াৰ পিছতে এইবাৰ ইমৰাণ খানৰ বিৰুদ্ধে আয় বহিভূৰ্ত সম্পত্তি আহৰণৰ অভিযোগ উত্থাপন কৰা হৈছে৷ ইমানেই নহয় পাক প্ৰধানমন্ত্ৰী শ্বেহবাজ শ্বৰীফে প্ৰাক্তন প্ৰধানমন্ত্ৰীগৰাকীৰ বিৰুদ্ধে সংগতিহীন সম্পত্তি আহৰণৰ অভিযোগ তুলি তদন্তৰ নিৰ্দেশ দিছে৷
লগতে পঢ়ক
পাক সংবাদ মাধ্যমে প্ৰকাশ কৰা মতে, প্ৰধানমন্ত্ৰী শ্বেহবাজ শ্বৰীফে চৰকাৰী সিদ্ধান্ত গ্ৰহণ কৰিছে যে ইমৰাণ খানৰ সকলো সম্পত্তি আৰু আয়ৰ উৎসৰ সমস্ত তথ্য পৰীক্ষা কৰা হ’ব৷ ইমানেই নহয় ইমৰাণ খানৰ দল তেহৰিক-ই-ইনছাফ(পিটিআই)ৰ চাৰিগৰাকী নেতাৰো সমস্ত সম্পত্তি, ইয়াৰ উৎস আৰু বেংক একাউণ্টসমূহৰো পৰীক্ষা কৰাৰ সিদ্ধান্ত লোৱা হৈছে৷
ইমৰাণ খানৰ বিৰুদ্ধে আয় বহিৰ্ভূত সম্পত্তিৰ অভিযোগ তুলি পাকিস্তানী তদন্তকাৰী সংস্থা ‘ফেডাৰেল ইনভেষ্টিগেচন এজন্সি(এফআইএ) আৰু ‘ফেডাৰেল ব’ৰ্ড অফ ৰিভিনিউ’ক ইতিমধ্যে তদন্তৰ নিৰ্দেশ দিয়া হৈছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
