বলীউড অন্যতম জনপ্ৰিয় অভিনেতা ছানী দেউল সম্প্ৰতি চৰ্চাত আছে। অভাৱনীয় সফলতা লাভ কৰে অভিনেতাগৰাকীৰ শেহতীয়া ‘গডৰ ২’ ছবিখনে। সম্প্ৰতি সামাজিক মাধ্যমত ভাইৰেল হৈছে ছানী দেউলৰ এক বিশেষ ভিডিঅ’। ভিডিঅ’টোত নিশা ৰাজপথত নিচাসক্ত হৈ ঘূৰি ফুৰা দেখা গৈছে ছানী দেউলক। মুহূৰ্ততে ভাইৰেল হৈ পৰা ভিডিঅ’টোৱে কৌতূহলৰ সৃষ্টি কৰিছিল অনুৰাগীসকলৰ মাজত। অৱশেষত সমগ্ৰ ঘটনাৰ ৰহস্যৰ ওৰ পেলালে অভিনেতাগৰাকীয়ে।
ভাইৰেল হোৱা ভিডিঅ’টোত ছানী দেউলক নিশা ৰাজপথৰ মাজত নিচাসক্ত হৈ ঘূৰি ফুৰা দেখা পোৱা গৈছে। এখন অটোৰ সৈতে দুৰ্ঘটনাত পতিত হোৱাৰ পৰা কথমপি ৰক্ষা পৰে অভিনেতাগৰাকী। ইয়াৰ পাছতে অটোচালকজনে ছানী দেউলৰ সৈতে কথা-বতৰা পাতে আৰু খোজ থৰক-বৰক হৈ থকা অভিনেতাজনক অটোত বহুৱাই দিয়ে। মুখত এটা হাঁহি লৈ অটোখনত বহে অৱশ চেহেৰাৰ ছানী দেউল।
বনজুইৰ দৰে বিয়পি পৰা ভিডিঅ’টোৱে চিন্তাত পেলাইছিল অভিনেতাগৰাকীৰ অনুৰাগীক। বিভিন্নজনে কৰিছিল বিভিন্ন প্ৰশ্ন। জানিবলৈ উৎসুক হৈ আছিল ঘটনাৰ প্ৰকৃত ৰহস্য।
বিশেষ ভিডিঅ’টো ভাইৰেল হোৱাৰ পাছত বুধবাৰে ছানী দেউলে সামজিক মাধ্যমত শ্বেয়াৰ কৰে এটি ভিডিঅ’। এই ভিডিঅ’টোৱে ভেদ কৰে ভাইৰেল হোৱা ভিডিঅ’টোৰ সমগ্ৰ ৰহস্য। ছানী দেউলে শ্বেয়াৰ কৰা ভিডিঅ’টোৰ কেপশ্যনত লিখে ‘অফৱাহো কা ‘ছফৰ’ বছ য়েহি তক’। দৰাচলতে ছানী দেউল সম্প্ৰতি ব্যস্ত হৈ আছে আগন্তুক ছবি ‘ছফৰ’ৰ শ্বুটিঙত। ভাইৰেল হোৱা ভিডিঅ’টো ‘ছফৰ’ ছবিখনৰেই শ্বুটিঙৰ এটা ক্লিপ। ছানী দেউল প্ৰকৃততে নিচাসক্ত অৱস্থাত নাছিল। প্ৰকৃত ঘটনা পোহৰলৈ অহাৰ পাছতহে অন্ত পৰে সকলো কৌতূহলৰ।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
