কেৱল ইনষ্টাগ্ৰামতেই ২৬৬ মিলিয়ন অনুৰাগী। বেটখন হাতত লৈ পেভিলিয়নৰ পৰা নামি আহোতেই গৰজি উঠে সমগ্ৰ ষ্টেডিয়াম। গুঞ্জৰিত হয় এটাই নাম – কোহলী কোহলী। লক্ষ লক্ষ অনুৰাগীৰ নয়নৰ মণি বিৰাট কোহলীৰ উত্তৰাধিকাৰী আহিছে। কিং কোহলীৰ ৰাজকুমাৰক লৈ এতিয়া ব্যস্ত হৈ পৰিছে সকলো। জুনিয়ৰ কোহলীয়ে এতিয়া দখল কৰিছে সামাজিক মাধ্যম।
ইংলেণ্ডৰ বিৰুদ্ধে চলিত টেষ্ট শৃংখলাৰ প্ৰথম দুখন টেষ্টৰ পৰা বিশ্ৰাম বিচাৰিছিল বিৰাট কোহলীয়ে। অনুৰাগীসকলৰ মাতজ উদ্ৰেক ঘটিছিল বিভিন্ন প্ৰশ্নৰ। ব্যক্তিগত কাৰণ দৰ্শাই তৃতীয় টেষ্টৰ পৰাও কোহলী আঁতৰি থকাত বিষয়টো আৰু অধিক চৰ্চিত হৈ পৰে। ইয়াৰ মাজতে দক্ষিণ আফ্ৰিকাৰ প্ৰাক্তন ক্ৰিকেটাৰ এবি ডি ভিলিয়াৰ্ছে কোহলী পিতৃ হোৱাৰ ইংগিত দি পৰৱৰ্তী সময়ত সেয়া ভুল তথ্য বুলি কৈ পুনৰ সন্দিহান কৰি তোলে কোহলীৰ অনুৰাগীসকলক। অৱশেষত মঙলবাৰে বিৰাট কোহলী আৰু অনুষ্কা শৰ্মাই ঘোষণা কৰে তেওঁলোকৰ জীৱনলৈ দ্বিতীয়টো সন্তান অহাৰ কথা। ১৫ ফেব্ৰুৱাৰীত কোহলী আৰু অনুষ্কাৰ দ্বিতীয়টো সন্তান জন্ম হোৱা বুলি সামাজিক মাধ্যমযোগে ঘোষণা কৰে। পুত্ৰ সন্তানৰ নাম আকায় ৰাখে বিৰুষ্কাই।
আকায়ৰ জন্মলাভৰ কথা ঘোষণাৰ লগে লগেই সক্ৰিয় হৈ উঠে সামাজিক মাধ্যম ব্যৱহাৰকাৰী। ছ’চিয়েল মিডিয়া প্লেটফৰ্মসমূহ ভৰি পৰে কোহলী আৰু আকায়ৰ পোষ্টেৰে। জনপ্ৰিয় ছবি ‘দ্য লায়ন কিং’ৰ মুফাছা আৰু ছিম্বাৰে ৰিজাইছে কোহলী-আকায়ক। ‘পোহৰে স্পৰ্শ কৰা সকলোতে আমাৰ ৰাজত্ব’ বুলি ছিম্বাক কোৱাৰ দৰেই কোহলীয়ে পুত্ৰ আকায়ক কোৱা ছবি উপস্থাপন কৰা হৈছে ছ’চিয়েল মিডিয়াত। কোহলী আৰু অনুষ্কাৰ ঘোষণাৰ পাছতেই সামাজিক মাধ্যমত আকায়ৰ নামত অলেখ একাউণ্ট খোলা হোৱা বুলিও তথ্য প্ৰকাশ হৈছে।
২০২১ চনত বিৰুষ্কাৰ জীৱনলৈ অহা ভামিকাই লাভ কৰিলে ভাতৃ। পিতৃ-মাতৃ বিৰাট-অনুষ্কাৰ জনপ্ৰিয়তাৰ সমানেই যেন এতিয়া টক অব দ্য টাউন হৈ উঠিছে তেওঁলোকৰ সদ্যোজাত পুত্ৰ আকায়।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
