ডাঃ প্ৰিয়ংকা দাসঃ শৰীৰৰ অন্যান্য সমস্যাৰ লগতেই দাঁতৰ সমস্যাত ভোগা মানুহ হয়তো নাই বুলিলেও ভুল নহ’ব। কথাতেই কয় বোলে-মানুহে দাঁতৰ বিষত ত্ৰাহি মধুসূদন দেখে। দাঁতৰ এই সমস্যাবোৰ বা বিষৰ মূল কাৰণেই হৈছে, দাঁতৰ ক্ষয়ৰোগ বা দন্তক্ষয়। দিনটোত আমি কত কি খাদ্য বা পানীয় নেখাওঁ— ইয়াৰে বিশেষকৈ খাদ্যবস্তু মানে যিবোৰ বস্তু চোবাই খাব লগা হয়, তাৰ ভৰ আমাৰ দাঁতেই ল’ব লাগে। পানীৰ বাদে, আন যিকোনো ধৰণৰ পানীয়ৰ অম্লজাতীয় পদাৰ্থও দাঁতৰ বাবে ক্ষতিকাৰক হয়।
দাঁতৰ এই ক্ষয়ৰোগৰ সহজ ভাষাত অৰ্থ হৈছে— দাঁতৰ কঠিন অংশত স্থায়ীভাৱে হোৱা ক্ষতি, যিয়ে পৰ্যায়ক্ৰমে দাঁতৰ ভিন্ন অংশত সৰু সৰু গাঁত বা ফুটাৰ সৃষ্টি কৰা অৱস্থা। বহু সময়ত দাঁতৰ বিভিন্ন অংশত হোৱা এই ক্ষয় বা ক্ৰমশঃ এই ক্ষয়ৰ ফলত সৃষ্টি হোৱা সৰু সৰু গাঁতৰ দৰে অংশই দাঁতৰ বিষকে আদি কৰি নিৰ্দ্দিষ্ট কিছুমান খাদ্য খালেই হোৱা দাঁতৰ সিৰসিৰণিৰ কাৰণ হৈ পৰে। দাঁতৰ এই সমস্যাত প্ৰধানতঃ শিশু, কিশোৰ আৰু বয়স্ক ব্যক্তিয়েই আক্ৰান্ত হোৱা দেখা যায় যদিও আন যিকোনো বয়সৰ লোকেই এই ৰোগৰ সন্মুখীন হ’ব পাৰে।
অসমীয়া সমাজত সাধাৰণতে দাঁতৰ এইদৰে ক্ষয় হোৱা অৱস্থাকে পোকে খোৱা বুলি কয় আৰু জৰা-ফুঁকাৰ মাধ্যমেৰে এই দাঁতৰ পোক নাশ কৰাৰ দৰে অন্ধবিশ্বাস এতিয়াও স্থানবিশেষে বিদ্যমান। পিছে কিয় আৰু কিদৰে দাঁতৰ এই ক্ষয়ৰোগ হয়, তাৰ বৈজ্ঞানিক বা চিকিৎসাবিজ্ঞান অনুসৰি নিৰ্দ্দিষ্ট কাৰণ আৰু কাৰক আছে। লগতেই এই ক্ষয়ৰোগৰ পৰা কিদৰে হাত সাৰিব পাৰি বা কেনেধৰণৰ উপযুক্ত চিকিৎসা ব্যৱস্থা গ্ৰহণ কৰা উচিত,সেই সম্পৰ্কে কিছু কথা আলোচনা কৰিম।
লগতে পঢ়ক পাকিস্তানী সুন্দৰীৰ যৌনতাৰ ফান্দত বায়ু সেনাৰ জোৱান, আইএছআইক ধৰিলে তথ্যৰ যোগান
দাঁতৰ ক্ষয়ৰোগ বা দন্তক্ষয় কিয় আৰু কিদৰে হয়? আমাৰ দেহৰ অন্যান্য অংশৰ দৰে আমাৰ মুখগহ্বৰতো আমি খোৱা বিভিন্ন ধৰণৰ খাদ্য বিশেষকৈ মিঠা, শ্বেতসাৰ প্ৰধান খাদ্যৰ দাঁতত লাগি থকা অৱশিষ্ট অংশবোৰকে অৱলম্বন কৰি বহু বেক্টেৰীয়া জীয়াই থাকে। বহু সময়তেই সাধাৰণতে মানুহে খাদ্য খাই মুখ ধোৱা বা দাঁত পৰিষ্কাৰ কৰা কাৰ্যলৈ পিঠি দিয়ে, ইয়াৰ ফলতো বেক্টেৰীয়া আৰু খাদ্যত থকা অম্লজাতীয় পদাৰ্থবোৰেও দাঁতৰ উপৰি অংশৰ ফলকখনৰ ক্ষতি কৰিবলৈ আৰম্ভ কৰে। আৰু এবাৰ এই উপৰি ফলকখনৰ ক্ষতি হোৱাৰ পিছত যদিহে উপযুক্ত চিকিৎসা নহয়, এই ক্ষতি ক্ৰমান্বয়ে বেছিৰ পৰা বেছিলৈ গতি কৰি থাকে। চিকিৎসা নহ’লে দাঁতৰ সৰু সৰু ছিদ্ৰবোৰেই ডাঙৰ হৈ গৈ থাকে আৰু ডাঙৰ ফুটাবোৰেদি দাঁতৰ অন্তৰ্ভাগলৈ বেক্টেৰীয়া আৰু অম্লজাতীয় দ্ৰব্যৰ অধিক মাত্ৰাত সৰবৰাহ ঘটিবলৈ আৰম্ভ কৰে।
ইয়াৰ ফলত দাঁতৰ উপৰ অংশৰ ক্ষতি দাঁতৰ অভ্যন্তৰলৈকে শিপাবলৈ ধৰে। বিষ, সংক্ৰমণ আদিৰ প্ৰকোপত ইতিমধ্যেই ক্ষতিগ্ৰস্ত দাঁতটোৰ আৰু অধিক ক্ষতি হ’বলৈ আৰম্ভ হয়। আনকি বহু ৰোগীৰ ক্ষেত্ৰত এই ক্ষতি ইমানেই বেছি হয়গৈ যে ক্ষয় হোৱা দাঁত উভালি পেলাবলগীয়াও হয়। এনেধৰণে বিভিন্ন কাৰক আৰু মানুহৰ নিজৰো অৱহেলা আৰু অমনোযোগীতাৰ ফলস্বৰূপেও দন্তক্ষয় ৰোগ হয়।
এইবোৰৰ উপৰিও অত্যধিক হাৰত হোৱা অম্লপিত্ত বা এচিডিটি আৰু অন্য শাৰীৰিক ৰোগজনিত কাৰণত মুখগহ্বৰত হোৱা শুষ্কতাৰ ফলতো কেতিয়াবা দন্তক্ষয় ৰোগ হ’ব পাৰে।
লগতে পঢ়ক ‘মোৰ কণ্ডৰ বিজ্ঞাপনে ভাৰতত যৌনতাৰ বিপ্লৱ আনিছিল’ কোনে কৰিলে এই দাবী?
এজন ব্যক্তিয়ে কেনেকৈ গম পাব যে তেওঁৰ দন্তক্ষয় ৰোগ আৰম্ভ হৈছে? কেইটিমান ঘৰতেই, সহজে নিজে জানিব পৰা লক্ষণ হৈছে—
১) হঠাতে কোনো বিশেষ বা তাৎক্ষণিক কাৰণ নোহোৱাকৈ আৰম্ভ হোৱা দাঁতৰ বিষ।
২) দাঁতৰ সংবেদনশীলতা বৃদ্ধি পোৱা বা সাধাৰণ ভাষাত-দাঁতৰ সিৰসিৰণি।
৩) মিঠা, গৰম বা ঠাণ্ডা খালেই হোৱা মৃদুৰ পৰা তীক্ষ্ণ মাত্ৰাৰ দাঁতৰ বিষ।
৪) দাঁতত লক্ষণীয়ভাৱে স্পষ্ট সৰু ছিদ্ৰৰ পৰা গাঁতৰ দৰে অংশ।
৫) দাঁতৰ যিকোনো অংশতে মূগা, ক’লা বা বগা— এই তিনিপ্ৰকাৰৰ ৰঙৰ প্ৰলেপ বা দাগ বহিবলৈ ধৰা।
৬) কিবা খাদ্যবস্তু কামুৰিলেই হোৱা বিষ।
লগতে পঢ়ক অবিশ্বাস্য হ’লেও সত্য এযোৰ জীৰ্ণ জোতাৰ মূল্য ১.৪৪ লাখ টকা!
এজন ব্যক্তিৰ দাঁতত উপৰোক্ত লক্ষণসমূহে দেখা দিয়াৰ অৰ্থ হৈছে ব্যক্তিজনক দন্ত-চিকিৎসাৰ প্ৰয়োজন হৈছে। এই লক্ষণসমূহ থকা এনে অৱস্থাত অৱহেলা কৰিলে পৰৱৰ্তী সময়ত ই ৰোগীজনৰ বাবে অধিক যন্ত্ৰণাদায়ক হৈ উঠাৰ সম্ভাৱনাও বাঢ়ি গৈ থাকে। দাঁতৰ ভিতৰছোৱাৰ কোমল অংশত থকা থকা সিৰা-উপসিৰা আৰু তেজ পৰিবাহী নলিকাবোৰ বেক্টেৰীয়া আৰু অম্ল বা এচিডৰ সংশ্ৰৱলৈ আহিলে সেইবোৰত হেঁচা পৰি দাঁতৰ আলু ফুলিবলৈ আৰম্ভ কৰে আৰু বিষ হয়।
দন্তক্ষয় ৰোগত সাধাৰণতে মুখৰ পিছফালৰ বা ভিতৰভাগৰ দাঁতবোৰ অধিক আক্ৰান্ত হয়। ইয়াৰ কাৰণ হৈছে-সমুখভাগৰ দাঁতৰ তুলনাত ভিতৰভাগৰ দাঁতৰ খলা-বমা অংশ বেছি থাকে, যাৰবাবে এই দাঁতবোৰ সম্পূৰ্ণকৈ চাফা কৰাত সমস্যা হয়। ফলত চাফা নোহোৱা খাদ্যবস্তুৰ তৰপ জমা হৈ হৈয়ো দন্তক্ষয় ৰোগত অৰিহণা যোগায়। কিবা খোৱাৰ পিছত যদি মুখৰ লালটিৰে পৰিষ্কাৰ হৈ নেযায়, তেন্তে নিজেই মুখ চাফা কৰা দৰকাৰ। আৰু নিয়মিতভাৱে অন্ততঃ দুবাৰকৈ দাঁত ব্ৰাছ কৰাও খুবেই জৰুৰী। ফ্ল’ৰাইড নামৰ খনিজ পদাৰ্থবিধৰ অভাৱতো কেতিয়াবা দাঁতৰ ক্ষয়ৰোগ হয়। যিকোনো ভাল ব্ৰেণ্ডৰে টুথপেষ্ট বা মুখ কুলকুলি কৰা ঔষধিযুক্ত দ্ৰৱ্যতো এই ফ্ল’ৰাইড উপলব্ধ। এইবোৰ ঘৰুৱাভাৱে কৰিব পৰা দুই এটা সাধাৰণ বিধি। পিছে সম্পূৰ্ণ ৰূপে দন্তক্ষয় ৰোগৰ পৰা উপশম পাবৰ বাবে আৰু পৰৱৰ্তী পৰ্যায়ত এই ৰোগৰ ফলত হ’ব পৰা জটিলতাসমূহৰ পৰা হাত সাৰিবৰ বাবে দন্ত-চিকিৎসকৰ পৰামৰ্শ আৰু চিকিৎসা লোৱা অতিকেই জৰুৰী।
দন্ত বিশেষজ্ঞ(বিডিএছ), মেডিচিটি, গুৱাহাটী। ফোন-৭০০২৭৪৬৪১৬
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
