বৈবাহিক জীৱনৰ বলপূৰ্বক যৌন সম্পৰ্কৰ বিষয়টো দিল্লী উচ্চ ন্যায়ালয়ত মীমাংসা নৌহওতেই কৰ্ণাটক উচ্চ ন্যায়ালয়ে এক গুৰুত্বপূৰ্ণ ৰায় প্ৰদান কৰিছে৷
বুধবাৰে এই যুগান্তকাৰী ৰায় প্ৰদান কৰি কৰ্ণাটক উচ্চ ন্যায়ালয়ে কয় যে ‘ধৰ্ষণ ধৰ্ষণেই, ই স্বামীৰ দ্বাৰাই হওক বা অন্যৰ দ্বাৰাই হওক’৷
উল্লেখ্য যে এগৰাকী মহিলাই স্বামীৰ বিৰুদ্ধে ধৰ্ষণ আৰু বলপূৰ্বক অপ্ৰাকৃতিক যৌন সম্পৰ্ক কৰাৰ অভিযোগ তুলি কৰ্ণাটকৰ বিশেষ আদালতৰ দ্বাৰস্থ হৈছিল৷
লগতে পঢ়ক ‘দ্য কাশ্মীৰ ফাইলছ’ৰ বিপক্ষে মন্তব্য কৰা দলিত যুৱকক মন্দিৰত অত্যাচাৰ, ৭ যুৱকক গ্ৰেপ্তাৰ
বিশেষ আদালতত গোচৰটো বিচাৰাধীন হৈ থকা সময়তে স্বামীগৰাকীয়ে স্বামীৰ বিৰুদ্ধে ধৰ্ষণৰ অভিযোগ কৰিব নোৱাৰি বুলি দাবী কৰি কৰ্ণাটকৰ উচ্চ ন্যায়ালয়ৰ দ্বাৰস্থ হয়৷ কিন্তু স্বামীগৰাকীয়ে কৰ্ণাটক উচ্চ ন্যায়ালয়ত চৰমভাৱে মুখ থেকেচা খালে৷
কৰ্ণাটক উচ্চ ন্যায়ালয়ে স্বামীগৰাকীৰ আবেদন খাৰিজ কৰি কয় যে বিবাহ অনুষ্ঠানৰ যোগেদি স্বামীক জন্তুৰ দৰে আচৰণ কৰাৰ অনুমতি দিয়া হোৱা নাই৷
ন্যায়াধীশ এম নাগপ্ৰসন্নে নিৰ্দেশটোত লগতে আৰু কয় যে ‘‘বিবাহ নামৰ অনুষ্ঠানৰ জৰিয়তে পুৰুষক জন্তুৰ দৰে আচৰণ কৰিবলৈ অনুমতি দিব নোৱাৰি, আমাৰ মতে দিয়া উচিত নহয়৷ পুৰুষৰ ক্ষেত্ৰত কোনো আচৰণ যদি শাস্তিযোগ্য অপৰাধ হয়, তেনে সেই শাস্তি স্বামী হ’লেও প্ৰদান কৰা উচিত৷’’
লগতে পঢ়ক মাখনতো বৰবিহ! বিষাক্ত মাখন খাই চাৰি শিশুৰ কৰুণ মৃত্যু, তিনিজনক গ্ৰেপ্তাৰ
দ্যৰ্থহীন ভাষাৰে ন্যায়ালয়ে লগতে কয় যে ‘‘পুৰুষ পুৰুষেই৷ ক্ৰিয়া ক্ৰিয়াই৷ ধৰ্ষণ ধৰ্ষণেই৷ পুৰুষ ‘স্বামী’ আৰু নাৰী ‘স্ত্ৰী’ হ’লেও৷’’
বৈবাহিক ধৰ্ষণ অপৰাধ হয় নে নহয় সেয়া এতিয়াই কোৱা উচিত নহয়, সেইটো নিৰ্ধাৰণ কৰাৰ দায়িত্ব আইন সভাৰ৷ এগৰাকী পত্নীয়ে পতীৰ বিৰুদ্ধে গুৰুতৰ অভিযোগ আনিছে আৰু আদালতে সেই গোচৰৰ বিচাৰহে কৰিছে বুলিও ন্যায়ালয়ে মন্তব্য কৰে৷
ন্যায়াধীশ নাগপ্ৰসন্নই লগতে কয়, ‘‘স্বামীৰ দ্বাৰা সংঘটিত যৌন নিগ্ৰহে পত্নীৰ মনত গভীৰ চাপ পেলায়৷ শৰীৰ আৰু মনকো প্ৰভাৱিত কৰে৷ তাৰ ফলত পত্নীগৰাকীৰ হৃদয় ক্ষতবিক্ষত হয়৷’’
লগতে পঢ়ক দিল্লীৰ হিংসাত্মক ঘটনা : JNUৰ প্ৰাক্তন ছাত্ৰ নেতা ওমৰ খালিদৰ জামিন খাৰিজ আদালতৰ
সংবিধানৰ ১৪ নং অনুচ্ছেদে নাৰী পুৰুষ উভয়কে সমধিকাৰ দিছে৷ স্ত্ৰীৰ শৰীৰ আৰু মনৰ গৰাকী অৰ্থাৎ মালিক স্বামী নহয়৷ অন্যৰ লগত স্বামীয়ে যিটো কাম কৰিলে অপৰাধ বুলি গণ্য কৰা হয় সেইটো পত্নীৰ ক্ষেত্ৰত স্বামীয়ে কৰিলেও তাক অপৰাধ বুলিয়ে মান্যতা দিয়া উচিত৷
ইফালে ভাৰতীয় দণ্ডবিধি আইনৰ ৩৭৫ ধাৰাত স্বামীক মুক্ত কৰি দিয়া বিষয়টো ‘পশ্চাদমুখী’ বুলিও অভিহিত কৰিছে ন্যায়াধীশগৰাকীয়ে৷ স্বামীগৰাকীয়ে এই ধাৰাতে স্বামীয়ে কৰা বলপূৰ্বক যৌন সম্পৰ্কক ধৰ্ষণ বুলি মানি ল’ব নোৱাৰি বুলি দাবী কৰি উচ্চ ন্যায়ালয়ৰ দ্বাৰস্থ হৈছিল৷
ইফালে পত্নীগৰাকীয়ে অভিযোগ কৰিছিল যে স্বামীয়ে তেওঁক যৌনদাসী হিচাপে ব্যৱহাৰ কৰি আহিছে৷ অভিযোগ মতে স্বামীয়ে কন্যাৰ চকুৰ আগতেও পত্নীক অপ্ৰাকৃতিক যৌন সম্পৰ্ক কৰিবলৈ বাধ্য কৰাই আহিছে৷ এই অভিযোগ তুলিয়ে পত্নীয়ে স্বামীৰ বিৰুদ্ধে ৩৭৫, ৪৯৮ক, ৫০৬সহ একাধিক ধাৰাৰ অধীনত গোচৰ ৰুজু কৰিছিল৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
