মানৱেন্দ্ৰ কুমাৰ দাসঃ যোৱা এপ্ৰিল মাহৰ পৰা ভাৰতৰ শ্বেয়াৰ বজাৰত পতন আৰম্ভ হৈছে। এনে ধাৰাবাহিক পতন অৰ্থাৎ নিম্নগামী ধাৰা অভাৱনীয়। কিন্তু কিয় এই অভাৱনীয় অৱস্থা? ইয়াৰ পূৰ্বে আমি বহুবাৰ উল্লেখ কৰিছো যে, দেশৰ ৰাজনৈতিক আৰু অৰ্থনৈতিক অৱস্থাৰ ওপৰত শ্বেয়াৰ বজাৰ চলি থাকে। অন্য অৰ্থত শ্বেয়াৰ বজাৰে দেশৰ অৰ্থনৈতিক আৰু ৰাজনৈতিক ভৱিষ্যতৰ ইংগিত দিয়ে। গতিকে আমাৰ দেশৰ শ্বেয়াৰ বজাৰে কি ইংগিত দিছে? তলত ইয়াৰ কিছু দিশ আলোচনা কৰা হৈছে।
বৰ্তমান ভাৰতত দৈনন্দিন ব্যৱহাৰ্য সামগ্ৰীৰ লগতে দীৰ্ঘম্যাদী ব্যৱহাৰ্য সামগ্ৰীৰো অত্যধিক মূল্য বৃদ্ধি হৈছে। তাৰ পৰিণতিত গ্ৰাহক মূল্য সূচাংক (Consumer Price Index) চমুকৈ চিপিআইৰ হাৰ উদ্বেজনক ভাৱে বৃদ্ধি হৈছে। সাধাৰণ অৰ্থত ইয়েই মুদ্ৰাস্ফীতি। যোৱা মাৰ্চ মাহত ভাৰতত মুদ্ৰাস্ফীতি বা ‘ইনফ্লেচন‘ৰ হাৰ আছিল ৬.৯৫ শতাংশ। মুদ্ৰাস্ফীতিৰ হাৰ ৩.৪৫ শতাংশতকৈ অধিক হ’লে ভাৰতৰ দৰে দেশত বিনিয়োগ প্ৰতিকূল হৈ উঠে। তেনে পৰিবেশত ঘৰুৱা বিনিয়োগকাৰীয়ে বজাৰ অৰ্থনীতি বা দেশৰ অৰ্থনৈতিক ব্যৱস্থাত বিনিয়োগ নকৰে। আৰু নগদ ধন মজুত ৰাখিবলৈ তৎপৰ হয়। ঠিক তেনেদৰে স্থাৱৰ সম্পত্তি ক্ৰয় কৰাৰ কথা চিন্তা কৰে।
লগতে পঢ়ক বাওঁপন্থী নেতা তথা শিক্ষকৰ কু-কৰ্ম! ৬০ ছাত্ৰীক যৌন নিৰ্যাতন কৰি হ’ল গ্ৰেপ্তাৰ
সেইবাবে যোৱা মাৰ্চ মাহৰ পৰা ভাৰতৰ শ্বেয়াৰ বজাৰত শ্বেয়াৰ বিক্ৰীৰ প্ৰৱণতা বাঢ়িছে। শ্বেয়াৰ বজাৰৰ ভাষাত এনে পৰিবেশক অ’ভাৰ চেলিং প্ৰেচাৰ বুলি কোৱা হয়। সেইবাবে ঘৰুৱা বিনিয়োগকাৰীয়ে ক্ষীপ্ৰতাৰে শ্বেয়াৰ বিক্ৰী কৰিছে। বহুতে প্ৰ’ফিট বুক কৰাৰ সুবিধা পাইছে যদিও আন বহুতে লোকচানতো শ্বেয়াৰ বিক্ৰী কৰা পৰিলক্ষিত হৈছে। যাৰ বাবে যোৱা তিনিটা ট্ৰেডিং চেছনত ৩৫ লাখ কোটি টকাৰ শ্বেয়াৰ বিনিয়োগকাৰীয়ে লোকচানত বিক্ৰী কৰিছে। অৰ্থাৎ যোৱা ১১,১২ আৰু ১৩ মে’ত ভাৰতৰ ঘৰুৱা বিনিয়োগকাৰীয়ে শ্বেয়াৰ বজাৰত ৩৫ লাখ কোটি টকাৰো অধিক লোকচান ভৰিবলগীয়া হ‘ল। ই দেশৰ অৰ্থনৈতিৰ বাবে শুভ লক্ষণ নহয়।
ধাৰাবাহিক মূল্য বৃদ্ধি আৰু মুদ্ৰাস্ফীতিৰ বাবে আন্তঃৰাষ্ট্ৰীয় ক্ষেত্ৰত ভাৰতীয় অৰ্থনীতিৰ নিৰ্ভৰযোগ্যতাও বহু হ্ৰাস হৈছে। সেইবাবে বিদেশী বিনিয়োগকাৰীসকলে ভাৰতৰ শ্বেয়াৰ বজাৰত অত্যধিক বিক্ৰী প্ৰৱণতা সৃষ্টি কৰিছে। যোৱা এপ্ৰিল আৰু মে’ মাহত কেৱল আমেৰিকাৰ বিনিয়োগকাৰীয়ে ১৭,৪০৩ লাখ কোটি টকাৰ শ্বেয়াৰ বিক্ৰী কৰিছে। যোৱা জানুৱাৰীৰ পৰা ১৩ মে’লৈ বৈদেশিক বিনিয়োগকাৰীয়ে ভাৰতৰ শ্বেয়াৰ বজাৰত ১,৪৪,৫৬৫ লাখ কোটি টকাৰ শ্বেয়াৰ বিক্ৰী কৰিছে। এনেদৰে বৃহৎ সংখ্যক শ্বেয়াৰ বিক্ৰী হোৱা বাবে আমাৰ দেশৰ শ্বেয়াৰ বজাৰত পতন অবধাৰিত হৈ পৰে।
লগতে পঢ়ক যৌন সংক্ৰামক ৰোগ বন্ধ্যাত্বৰ কাৰণ হ’ব পাৰে নেকি? এইবোৰ লক্ষণ দেখা পালে সাৱধান হওক
একে সময়তে ভাৰতীয় মুদ্ৰাৰ মূল্যও বহু হ্ৰাস হৈছে। যোৱা ১৩ মে’ত এক আমেৰিকান ডলাৰৰ মূল্য হৈছে ৭৭.৪৪ টকা। আৰু সেইবাবে আগন্তুক সময়চোৱাত ভাৰতৰ শ্বেয়াৰ বজাৰত অধিক বিক্ৰীৰ চাপ সৃষ্টি হ’ব পাৰে। কিন্তু এইটো দেশৰ বাবে মুঠেই শুভ নহয়। এপ্ৰিল মাহত ভাৰতত মুদ্ৰাস্ফীতিৰ হাৰ ৭.৪০ শতাংশ। ভাৰতৰ দৰে এখন বিকাশশীল ৰাষ্ট্ৰৰ বাবে এই হাৰ উদ্বেজনক। তেনে পৰিবেশত আন্তঃৰাষ্ট্ৰীয় ক্ষেত্ৰত ভাৰতীয় অৰ্থনীতিৰ নিৰ্ভৰযোগ্যতাও কম হয়। পৰিস্থিতি অধিক শোচনীয় হ’ব পাৰে বুলি শংকিত হৈ গৰিষ্ঠসংখ্যক বিদেশী বিনিয়োগকাৰীয়ে ভাৰতৰ শ্বেয়াৰ বজাৰ ত্যাগ কৰিছে। ধাৰাবাহিক মূল্যবৃদ্ধি আৰু মুদ্ৰাস্ফীতিৰ পৰিণতিত চুবুৰীয়া ৰাষ্ট্ৰ শ্ৰীলংকাত যি ভয়াৱহ ঘটনা ঘটিব লাগিছে, তাৰবাবেও শংকিত হৈছে বিনিয়োগকাৰী। ভৰতো সেই দিশে আগবাঢ়িছে নেকি?
যোৱ সপ্তাহত ভাৰতীয় শ্বেয়াৰ বজাৰৰ কিছু তথ্যও উল্লেখ কৰা ভাল হ‘ব। এই সময়ছোৱাত শ্বেয়াৰ বজাৰত বঢ়া টুটাৰ অনুপাত ২:৯। অৰ্থাৎ দুটা শ্বেয়াৰ বঢ়াৰ বিপৰীত ন টা শ্বেয়াৰৰ দাম কমিছে। যোৱা সময়চোৱাত ৭৬০ টা কোম্পানীৰ শ্বেয়াৰৰ দাম বাঢ়িছে। নিম্নগামী হৈছে ২৬০১ টা শ্বেয়াৰৰ দাম। ৫৫৩ টা শ্বেয়াৰে ল’ৱাৰ শ্বাৰ্কিত স্পৰ্শ কৰে। অৱশ্যে তাৰ মাজতো বহুকেইটা শ্বেয়াৰত বিনিয়োগ কৰাৰ সুযোগ আহিছে। কিয়নো স্থিতাৱস্থা সৰহ দিনলৈ নাথাকে। তথাপিও কিন্তু শ্বেয়াৰ বজাৰে ভয়াৱহ অৰ্থনৈতিক অৱস্থাৰ ইংগিত দিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
