দেশৰ ৰাজনীতিক বুলড’জাৰে গৰম কৰি ৰখাৰ সময়তে ভাৰত ভ্ৰমণত ব্যস্ত থকা ব্ৰিটিছ প্ৰধানমন্ত্ৰী বৰিছ জনচনে বুল’ডজাৰ চলোৱা কাৰ্যই বিশেষ তাৎপৰ্য বহন কৰিছে৷
ইতিমধ্যে ব্ৰিটিছ প্ৰধানমন্ত্ৰী জনচনে বুলড’জাৰ চলোৱাৰ দৃশ্য তথা ফ’টোৱে সামাজিক মাধ্যমত তোলপাৰ লগাইছে৷ টুইটাৰৰ লগতে সামাজিক মাধ্যমৰ অন্য চাইটসমূহতো ব্ৰিটিছ প্ৰধানমন্ত্ৰী বৰিছ জনচনৰ বুলড’জাৰ চলোৱা ফ’টো ট্ৰেণ্ডিঙত আছে৷
বিভিন্ন লোকে ব্ৰিটিছ প্ৰধানমন্ত্ৰীগৰাকীৰ এই ফ’টো শ্বেয়াৰ কৰাৰ লগতে তাত বিভিন্ন ধৰণৰ মন্তব্য কৰা পৰিলক্ষিত হৈছে৷ আনকি সামাজিক মাধ্যমত বহুতে ব্ৰিটিছ প্ৰধানমন্ত্ৰীগৰাকীক বুলড’জাৰ চালকৰূপে মিম সৃষ্টি কৰি শ্বেয়াৰ কৰাও দেখা গৈছে৷
লগতে পঢ়ক কিয় ছাতিৰে নিজকে ঢাকি ৰাখিছিল শ্বাহৰুখ আৰু গৌৰি খানে?
ইফালে যোৱা দুদিনমান ধৰি বুলড’জাৰে ভাৰতীয় ৰাজনীতি উত্তাল কৰি ৰাখিছে৷ বিশেষকৈ দিল্লী পৌৰ নিগমে বুলড’জাৰেৰে জাহাংগীৰপুৰীত চলোৱা বিধ্বংসী উচ্ছেদ কাৰ্যক বিভিন্ন ৰাজনৈতিক দলে কেন্দ্ৰীয় চৰকাৰক আক্ৰমণ কৰিছে৷ আনিক আম আদমি পাৰ্টিৰ অৰবিন্দ কেজৰিৱালৰ চৰকাৰৰ ভূমিকাকো বিভিন্ন পক্ষই সমালোচনা কৰিছে৷
উচ্চতম ন্যায়ালয়ে উচ্ছেদৰ স্থাগিতাদেশ দিয়াৰ পিছতো কেন্দ্ৰ চৰকাৰ আৰু দিল্লী পৌৰ নিগমে কেনেকৈ জাংহাগীৰপুৰীত উচ্ছেদ চলালে তাকে লৈ প্ৰশ্নৰ উত্থাপন হৈছে৷ বামপন্থী নেত্ৰী বিন্দা কাৰাটে উচ্ছেদস্থলীত উচ্চতম ন্যায়ালয়ৰ স্থগিতাদেশৰ নিৰ্দেশ পত্ৰ লৈ উপস্থিত হোৱাৰ পিছতে এই বিষয়টোৱে অধিক চৰ্চা লাভ কৰিবলৈ ধৰে৷
ইয়াৰ পিছতে কেন্দ্ৰীয় চৰকাৰ আৰু দিল্লী পৌৰ নিগমে এক ভয়ংকৰ তথ্য প্ৰকাশ কৰিছে৷ কেন্দ্ৰই উচ্চতম ন্যায়ালয়ত দাখিল কৰা এক তথ্যৰ মতে ২০২১ চনৰ জানুৱাৰী মাহতে জাংহাগীৰপুৰীত উচ্ছেদ আৰম্ভ কৰা বুলি কোৱা হৈছে৷ আনফালে উচ্ছেদৰ সময়ত কেৱল ধৰ্মীয় সংখ্যালঘুসকলক লক্ষ্য কৰি লোৱা বুলিও গুৰুতৰ অভিযোগ উঠিছে৷
লগতে পঢ়ক চানগ্লাছ নিবলৈ পাহৰিলে মিলিন্দৰ পত্নী অংকিতাই : কি অথন্তৰ ঘটিল সাগৰৰ পাৰত?
এনে অভিযোগ প্ৰতিঅভিযোগৰ মাজতে বুলড’জাৰ এতিয়া ভাৰতৰ ৰাজনীতিত ভয়ংকৰ দৈত্যৰূপে পৰিগণতি হৈছে৷ ঠিক তেনে সময়তে ভাৰত ভ্ৰমণত ব্যস্ত থকা ব্ৰিটিছ প্ৰধানমন্ত্ৰী বৰিছ জনচনে গুজৰাটত উপস্থিত হৈয়ে বুলড’জাৰ কাৰখানাত উপস্থিত হৈ বুলড’জাৰ চলোৱা কাৰ্যই বিভিন্ন প্ৰশ্নৰ উদ্ৰেক কৰিছে৷
সেয়ে ব্ৰিটিছ প্ৰধানমন্ত্ৰীগৰাকীৰ এই কাৰ্যই সামাজিক মাধ্যমত ট্ৰেণ্ডিঙত থকা দেখা গৈছে৷ ইফালে ২১ আৰু ২২ এপ্ৰিলত দুদিনীয়া ভাৰত ভ্ৰমণলৈ অহা ব্ৰিটিছ প্ৰধানমন্ত্ৰী বৰিছ জনচনে গুজৰাট উপস্থিত হৈ সাবৰমতী আশ্ৰমত উপস্থিত হৈ সূতা কাটি থকাৰ ফ’টোও ভাইৰেল হৈছে৷ ব্ৰিটিছ প্ৰধানমন্ত্ৰীগৰাকীয়ে শুক্ৰবাৰে দিল্লীত উপস্থিত হ’ব আৰু তেওঁ প্ৰধানমন্ত্ৰী নৰেন্দ্ৰ মোদীৰ সৈতে বৈঠকত বহাৰ সম্ভাৱনা আছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
