সমগ্ৰ মুখমণ্ডলত তেজৰ চেকুৰা৷ মুখমণ্ডলৰ তেজৰ দাগবোৰ শুকাই গৈছে৷ মূৰত বগা কাপোৰৰ বেণ্ডেজ৷ তেজৰ দাগেৰে ৰাঙলি পোছাক৷
এই বিধ্বস্ত শৰীৰৰে উদাত্ত কণ্ঠেৰে দেশ মাতৃক ৰক্ষা কৰিবলৈ প্ৰতিজ্ঞাৱদ্ধ হৈছে এগৰাকী ইউক্ৰেইনিয়ান শিক্ষয়িত্ৰীয়ে৷
তেওঁৰ নাম ওলেনা কুৰিলো৷ দেশখনৰ যুদ্ধবিধ্বস্ত খাৰকিভ অঞ্চলৰ চুগুয়েভ চহৰৰ বাসিন্দা৷
যোৱা তিনিদিন ধৰি ৰাছিয়াই উক্ত অঞ্চলটোত ধাৰাষাৰে বোমাবৰ্ষণ কৰিছে৷ ক্ষেপণাস্ত্ৰেৰে চলাইছে এই আক্ৰমণ৷ বোমাই গৈ শিক্ষয়িত্ৰী কুৰিলো বাসগৃহটো ধ্বংস কৰি পেলালে৷ বিকট শব্দত কঁপি উঠিল সমগ্ৰ অঞ্চল৷ বাসগৃহটো সম্পূৰ্ণৰূপে ধ্বংসস্তূপত পৰিণত হ’ল৷ কেনেবাকৈ প্ৰাণৰক্ষা পৰে কুৰিলোৰ৷ কিন্তু আঘাতপ্ৰাপ্ত হয় কুৰিলো৷
ইউক্ৰেইনৰ সেনাই আঘাতপ্ৰাপ্ত কুৰিলোক উদ্ধাৰ কৰে৷ চিকিৎসা কৰি মূৰত বেণ্ডেজ বান্ধি দিয়ে চিকিৎসকে৷ মৃত্যুৰ মুখৰ পৰা বাচি অহা কুৰিলো এতিয়া দেশ মাতৃ ৰক্ষাৰ বাবে অতি দৃঢ়প্ৰতিজ্ঞ৷ দেশ মাতৃক ৰক্ষা কৰিবলৈ নিজৰ প্ৰাণ দিবলৈ এতিয়া প্ৰস্তুত শিক্ষয়িত্ৰী কুৰিলো৷
ইতিহাসৰ শিক্ষয়িত্ৰী কুৰিলোৱে কৈছে, ‘‘ইউক্ৰেইন মোৰ জন্মভূমি৷ মোৰ মাতৃ ভূমিক ৰক্ষাৰ বাবে যি কৰিব লাগে মই তাকেই কৰিম৷’’
কুৰিলোৰ এই দৃঢ়তাই ইউক্ৰেইনৰ হাজাৰ হাজাৰ লোকক ৰাছিয়াৰ বিৰুদ্ধ যুঁজ দি দেশ মাতৃক ৰক্ষা কৰিবলৈ উদ্বুদ্ধ কৰি তুলিছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
