আৰ্থিক সংকটত ভূগি আছে পাকিস্তান৷ নতুন চৰকাৰ গঠনৰ পাছতো এই ছবিৰ সলনি হোৱা নাই৷ মানুহে খাবলৈ পোৱা নাই৷ নিত্যপ্ৰয়োজনীয় সামগ্ৰীৰ দাম পাকিস্তানত আকাশলংঘী৷ শ্বাহবাজ ছৰিফৰ মূৰৰ ওপৰত আছে বিপুল পৰিমাণৰ ঋণৰ বোজা৷ কিন্তু চৰকাৰৰ এই বিষয়টোক লৈ কোনো চিন্তাই নাই তাৰ সলনি আৰ্থিক সংকটৰ মাজতেই সামৰিক শক্তি ক্ৰমাগতভাৱে বৃদ্ধি কৰাত লাগিছে পাকিস্তান৷
চীনৰ সৈতে পাকিস্তানৰ সম্পৰ্ক বহু পুৰণি৷ চীনৰ পৰাই সাধাৰণতে অস্ত্ৰ ক্ৰয় কৰে পাকিস্তানে৷ ২০২৩ চনত প্ৰকাশিত এক ৰিপৰ্টত দাবী কৰা হৈছিল যে চীনে প্ৰভাৱ বিস্তাৰ কৰা দেশৰ ৮২ খনৰ ভিতৰত শীৰ্ষত আছে পাকিস্তান৷ পাকিস্তানৰ প্ৰযুক্তি, বিদেশনীতি আৰু সামৰিক ক্ষেত্ৰত চীনৰ প্ৰভাৱ বেছি৷ চীন আৰু পাকিস্তানৰ মাজত সামৰিক অংশীদাৰীত্ব বিগত এক দশক ধৰি উল্লেখনীয় হাৰত বৃদ্ধি পাইছে৷
ষ্টকহোম ইণ্টাৰনেশ্যনেল পিছ ৰিচাৰ্ছ ইনষ্টিটিউটৰ এক প্ৰতিবেদনে দাবী কৰিছে যে ২০১৯ চনৰ পৰা ২০২৩ চনৰ ভিতৰত পাকিস্তানে যি অস্ত্ৰ আমদানি কৰিছে তাৰ ৮২ শতাংশই চীনৰ পৰা আমদানিকৃত৷ যুদ্ধবিমান, যুদ্ধজাহাজ, ক্ষেপণাস্ত্ৰ প্ৰযুক্তি, ড্ৰোণ, ছাবমেৰিন সকলোবোৰ চীনৰ পৰাই ক্ৰয় কৰিছে পাকিস্তানে বুলি দাবী কৰিছে সেই বিশেষ প্ৰতিবেদনে৷ পাকিস্তানৰ সামৰিক শক্তিক শক্তিশালী কৰাত চীনৰ অৱদানক লৈ আলোচনা কৰা হৈছে সেই বিশেষ প্ৰতিবেদনত৷
পাকিস্তানক সামৰিক সাহায্য আগবঢ়াই ভাৰত, আমেৰিকা, জাপান, অষ্ট্ৰেলিয়া আৰু পশ্চিমি শক্তিসমূহৰ বিৰুদ্ধে যুঁজ দিবলৈ চীনে ৰণকৌশল প্ৰস্তুত কৰি আছে বুলি প্ৰকাশ কৰিছে একাংশই৷ বিগত এক দশকত বেইজিঙে সেই নীতি অৱলম্বন কৰি বিশ্বৰ অন্য দেশসমূহৰ ওচৰত নিজকে জাহিৰো কৰিছে৷ ২০১৫ চনত চীনৰ প্ৰেছিডেণ্ট ছি জিনপিঙে পাকিস্তানলৈ যাত্ৰা কৰিছিল৷ সেই সময়তে পাকিস্তানৰ নৌশক্তি বৃদ্ধিক লৈ আলোচনা হয় দুই দেশৰ মাজত৷ পাকিস্তানে ৮খন ডুবাৰুজাহাজ নিৰ্মাণৰ বাবে এক চুক্তিও স্বাক্ষৰ কৰিছিল চীনৰ সৈতে৷
কেৱল ডুবাৰুজাহাজেই নহয়, সামৰিক শক্তি বৃদ্ধিতো চীনৰ সহায় লৈছে পাকিস্তানে৷ আৰ্থিক সমস্যাত ভূগি থকা পাক চৰকাৰে উল্লেখযোগ্যভাৱে সামৰিক শক্তি বৃদ্ধি কৰিছে৷ ভাৰত-পাক সীমান্তত শক্তি বৃদ্ধি কৰিবলৈকে সামৰিক বাহিনীক উন্নত কৰাত লাগিছে পাক চৰকাৰ৷ ইছলামাবাদৰ গাদীত বহি দেশৰ অৰ্থনৈতিক সমস্যা সমাধান কৰাতকৈ এইবোৰ কামতহে ব্যস্ত হৈ আছে পাক চৰকাৰ৷
২০২২ চনত হঠাৎ আৰ্থিক সংকটৰ সন্মুখীন হৈছিল পাকিস্তান৷ বিগত দুবছৰ ধৰি মূল্যবৃদ্ধিৰ বাবে নাজল-নাথল অৱস্থা পাক নাগৰিকৰ৷ খাদ্যক লৈ সেই দেশৰ মানুহে ৰাস্তাত মাৰপিট কৰাৰ দৃশ্যও মাজে মাজে দেখা গৈছে সামাজিকমাধ্যমত৷ নিত্য প্ৰয়োজনীয় সামগ্ৰীৰ দাম কমাৰ নামেই লোৱা নাই পাকিস্তানে৷ ক্ৰমাগত দ্ৰব্যমূল্য বৃদ্ধিত পাকিস্তানৰ আমজনতা অতিষ্ঠ হৈ পৰিছে৷ আৰ্থিক সংকটে তেওঁলোকক জুৰুলা কৰিছে৷ ২০২৩ চনত মূল্যবৃদ্ধিৰ হাৰ হৈছেগৈ ৩৮শতাংশ৷ চৰকাৰী তথ্যই জনোৱা অনুসৰি পাকিস্তানত বিলাহীৰ দাম প্ৰতি কিঃগ্ৰাঃত ১৮৮ টকা, পিঁয়াজ প্ৰতি কিঃগ্ৰাঃ ৮৪ টকা,আটা-ময়দাৰ দামো তেনেকৈ আকাশলংঘী পাকিস্তানত৷
কিন্তু কিয় এই অৱস্থা হ’ল পাকিস্তানৰ অৰ্থনীতিৰ? বিশেষজ্ঞসকলৰ মতে পাকিস্তানৰ ওপৰত বিপুল ঋণৰ বোজা থকাটোৱেই এই পৰিস্থিতিৰ সৃষ্টি কৰিছে৷ আন্তৰ্জাতিক মুদ্ৰা ভাণ্ডাৰে পাকিস্তানক ঋণ দিয়াৰ ক্ষেত্ৰত এতিয়া কিছু চৰ্ত বান্ধি দিছে৷ আই এমএফৰ চৰ্তৰ কাৰণে পাকিস্তান চৰকাৰ সংকটত পৰিছে৷ যাৰ ফলত খাদ্যসামগ্ৰীৰ পৰা মৌলিক চাহিদালৈকে সকলোবোৰেই ব্যয়বহুল হৈ উঠিছে পাকিস্তানত৷ বিগত বৰ্ষত হোৱা ভয়াৱহ বানো মুল্যবৃদ্ধি ৰোধত হেঙাৰ হৈছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
